Liverpool nomawi beiseina hmaah Fulham

Jurgen Klopp-a'n thiam tak a, "Liverpool 2.0" tih ngata hming lem a pek, Reds-in tun season-ah German coach hoin an vanglai an chen mek a, inelna an telnaah chuan champion an la beisei vek!

Liverpool hian Premier League table chung ber luahin hmahruaitu an ni mek a, FA Cup-ah fourth round an lut fel tawh a, Europa League-ah round of 16 an khel dawn a, League Cup semifinal an lut bawk.

Zanin dar 1:30 hian League Cup semfinal hi an khel dawn a, Liverpool nomawi chawi tumna kawng dal tura lo ding tur chu Fulham an ni - Anfield-ah an inkhel ang.

Hetihrual hian League Cup semifinal hi double leg-a khelh tur a ni a, away goal rule hman a ni dawn lo thung. Nizan khan semifinal inkhel hmasa zawkah Chelsea chuan Middlesbrough an lenchilh a, result kan hre hman lo.

Kim a har

Fulham tan Liverpool an u hret tih hai rual a ni lo a, chutihrual chuan Cottagers (Fulham sawina) hian duhthlang thei ni ngat se, tun hun taka Liverpool hmachhawn hi an thlang ang.

Klopp-a naute an kim lo a ni satliah lo a, player langsar awm lo an awm nual. Mohamed Salah chu AFCON khelh vangin a inlan thei dawn lo a, Egyptian forward thiamzia hmu fotu Fulham tan chuan thawk huaina tham a tling ang.

Salah chauh a ni lo - tun hnaia Liverpool tana hmun pawimawh chang chho Wataru Endo chu Asian Cup khel turin a zinchhuah a ṭul a, Dominik Szoboszlai a la inhliam bawk.

Match hnuhnung bera damlohna vanga inlan lo captain Virgil van Dijk dinhmun sawi chian theih a la ni lo a, Andrew Robertson (dar), Kostas Tsimikas (khingkhang ruh), Stefan Bajcetic (chawn), Thiago Alcantara (khel), Ben Doak (khup) leh Joel Matip (khup) te chu hliam an neih sa an ni bawk a, Reds an kim lo hle.

Engtin nge?

Salah awm lo a langsar a, chutihrual chuan tlarhmaa Reds player-te hi club dang tana chil tiput tham vek an ni. Chutihrual chuan Darwin Nunez hian bul a ṭan a nih chuan goal a khung a ṭul tawh a, tun hnaia a chance khawhral zozai thlirin Klopp-a'n a dawhtheihna a hloh ṭan a nih pawhin a mak lo ang.

Luis Diaz a rintlak reng ṭhin a, hliam vanga a chawlh reng hnua lo kir Diogo Jota a nung leh ta viau a, tun season-a goal riat leh assist vawi thum nei tawh Cody Gakpo pawh hi Fulham tan namnul chi a ni dawn lo.

VVD inlan thei lo pawh ni se, kum 20 mi Jarell Quansah rintlakzia hmuh turin a awm fo a, VVD nena an din dun loh ṭuma pawh kum 24 mi Ibrahima Konaté hi a inringtawk ta viau bawk.

Goalkeeper erawh Alisson aiah League Cup lama chhawr ṭhin Caoimhín Kelleher bawk a lutin a rinawm a, midfield-ah Curtis Jones, Alexis Mac Allister leh Ryan Gravenberch an awm avangin Reds fans an hlauthawng lo ang.

Fulham an ṭha

Liverpool an la ṭhat tawk thu kan sawi rualin, ṭhat dan bera inlan tur an nih miau loh avangin ṭum dang aiin Fulham-in an zuam sawt ang tih a chiang a, Reds barakhaih turin Fulham hian player pawh an nei ṭha tawk.

Fulham hian an match hnuhnung berah FA Cup third round khelin, Rotherham chu 1-0 in an hneh a, he inkhelah hian coach Marco Silva chuan Liverpool nena an inkhel tur thlirlawkin a player ṭha Bernd Leno, Joao Palhinha leh Raul Jimenez te chu bench lamah a dah.

Kum 31 mi Leno hi Bayer Leverkusen leh Arsenal tana first choice keeper ni reng thei a ni a, Palhinha hi nipui transfer-a European club lian ho chil tiputtu a ni. Jiménez-a'n tun season-ah goal la khung tam tawk lo mah se, theihna a nei sang tih chu kan hriat sa a ni.

Liverpool aṭanga inzir chhuak, Klopp-a mit a tlun loh avanga chhuak ta Harry Wilson pawh hian amah chher liantu club hi lo hrem a châk dawn - tun season-ah match 25 khela goal thum khungin, assist vawi ruk a nei tawh a, ven bik ngai zingah a tel.