Number 1 Djokovic inpeih hman a rinawm

Australian Open 2024 khelh hun a hnai a, tun kar tawp Pathianni aṭangin an khel tawh dawn. Novak Djokovic chu inkhel loin a awm mek - Serbia tana a feh chhuahna lamah a banrek a hliam vang a ni.

World number 1 Djokovic hian kuminah inelna a la hmachhawn tam lo, mimal bik phei chuan tournament a la khel lo. Mahse, vawi 10 ngawt a champion tawhna hmunah erawh inlan theih ngei a tum ruh hle.

Grand Slam vawi 24 champion tawh Djokovic chuan, "Australian Open khel tur hian hun ka nei tam tawkah ka ngai, inkhel turin ka inpeih ngei a ngai a, chu chu thil pawimawh ber pawh a ni bawk," a ti.

Kum 36 mi Djokovic hian Grand Slam nomawi neih tam lamah Rafael Nadal (22 titles) a khum tawh a, a record ṭha tak hi a tinghet zual dawn ni pawhin a lang - amah hnaih bertu Nadal hian hliam vangin Australian Open a khel dawn lo.

Nadal inlan lo mah se Djokovic tan a title humhim hi thil awlsam tak erawh a ni bik lo mai thei. Season hmasa Wimbledon final-a a ngam loh Carlos Alcaraz chu kuminah pawh a elpui hautak tur a ni ang.

Spanish tlangval Alcaraz bakah hian hard court hmang thiam Daniil Mevedev, season hmasa finalist Stefanos Tsitsipas leh Adrey Rublev te hi Novak chhaih buai phak tura ngaih an ni.

Tun hnaiah Alexander Zverez a rawn khel ṭha bawk. German tlangval hian theihna nei sang viau mah se Grand Slam bikah beisei a phak lo leh ṭhin, kuminah major title lak ngei a tum ruh zual ang.

Tennis season khat chhunga Grand Slam hmasa ber Australian Open hi January 14-28 chhungin Melbourne Park-ah khelh a ni dawn - Australia ramah chuan nipui khawlum lai a ni leh ang.