Man City hmachhawn tur Spurs

FA Cup fourth round inkhel tur pawh a ni a, champion lai Manchester City chu Tottenham Hotspur khelmualah an lenglut dawn. Fourth round bikah chuan Premier League club lian pahnih inkhel tur hi ngaihven hlawh ber a ni ang.

Season hmasa khan Pep Guardiola nauten Premier League, Champions League leh FA Cup an la vek, kuminah pawh an nomawi hi humhim leh an duh ang, hum tur erawh chuan an hna a hautak chho dawn.

Chelsea chuan champion tum ngam zinga mi Aston Villa chu Stamford Bridge-ah an lo mikhual dawn, anni pahnih inkhel tur pawh hi mipui ngaihven hlawh zinga mi a ni - Unai Emery enkawl Villa hian season an hman ṭhat avangin dah hniam a rem lo.

FA Cup huanga record nei ṭha ber Arsenal hnehtu Liverpool chuan Norwich City leh Bristol Rovers inkhela chak zawk an tum dawn, a lan dan chuan eng team zawk pawh hi tlang ni se Reds tan hna hautak an ni phak lo ang.

Football knockout tournament upa ber FA Cup fourth round hi February 27-28, 2024 khelh tura ruahman a ni.