Sindhu-i'n coach thar a nei

Badminton world champion hlui PV Sindhu chuan season ṭha tak neih a duh a, infiamna khawmpui lian Paris Olympic neih kum tur a nih bawk avangin ṭan a la nasa hle - coach thar Agus Dwi Santoso nen an thawk dun.

India nula chhuanvawr hian tun hmain Olympic medal vawi hnih a lo la tawh a, khawvel huap hlawhtlinna hrang hrang pawh a chang tawh. Mahse, nikum khan hliamin a tibuai a, tournament a khelh hoah pawh a che ṭha tawk lo.

Kum 28 mi Sindhu chuan, "Tunah hian Agus Dwi Santoso nen training kan nei dun tawh. Hnai takah min awmchilhin hmasawn ka ngaihna lai leh insiamṭhat ka ngaihna lai chu a lo hmu chat chat zel.

"Coach thar bakah team thar kan ni a, Olympic neih kum a nih avangin boruak ṭha neih a ngai a, boruak nuam leh phurawm tak nena kum hman a pawimawh dawn," a ti a, a vawi thum nan Olympic medal lak ngei a tum.

Tunah chuan Sindhu hian Padukone Academy, Bengaluru-ah training a nei mek. Badminton khelh dan phung bakah taksa hrisel leh fit ṭha a neih theih nan coach hian a pui dawn a ni.

Tun hmain Indonesian coach Santoso-a hian Olympic silver medal la tawh Hendrawan, Budi Santoso leh Busanan Ongbamrungphan te pawh a lo kaihruai tawh. Tokyo Olympics-ah pawh khan India team a lo pui tawh bawk.