Spanish Super Cup-ah Madrid derby kan hmu dawn

Zanin dar 12:30-ah Madrid derby hmuhnawm en tur kan nei dawn - Real Madrid leh Atletico Madrid te chu Spanish Super Cup-ah an intawng dawn a, team inhal tak innuai tur an nih avangin a hmuhnawm loh ring suh.

Supercopa de España hi tun hmaa La Liga leh Copa del Rey champion-in an inchuh ang ngawt kha a ni tawh lo a, club paliin inelna an hmachhawn tawh - hei vang hian zanina chak hi an champion nghal ngawt dawn lo.

Ningani zan dar 12:30-ah Barcelona leh Osasuna chu semifinal lehlamah an intawng dawn thung a, final hi January 14-ah khelh a ni dawn - tun hma zawng aiin nomawi a hlu zual sawt.

Hello Saudi

Spanish Super Cup hi Saudi Arabia-ah khelh a ni daih. Hei hi a chhan ber chu Spanish Football Federation-in kum 2019-a Saudi Arabia sorkar chu inremna an neihpui vang a ni a, kum thum chhung atan inelna hi thleng turin inremna an neihpui.

Spanish football thuneitute leh Saudi sorkar inremna hi dollar maktaduai 120 chuang hu a ni a, kum 2021 khan kum 2029 thleng Saudi-in he inelna hi an thlen turin $120mtd-in inremna ziah leh a ni.

Hei vang hian kumin inelna pawh hi Riyadh, Saudi-ah khelh a ni dawn a, match khelh tur tam karah, Spanish Super Cup khel tura Saudi Arabia pan ngai hi fans tan chuan hahthlak a tling ang.

Inelna chu

Spanish Super Cup-ah hian La Liga pakhatna leh pahnihna bakah, Copa del Rey champion leh pahnihna te chu inel tur an ni. Real Madrid hi Copa del Rey champion an nih avangin inelna hmachhawn turin an tling a, La Liga pahnihna 'quota' an la nei cheu bawk.

Hei vang hian an hmelma club, La Liga-a pathumna Atletico Madrid chuan chance an neih phah a, a kalphung pangngaiah chuan inelna khel lo tur ni mah se, league-a pahnihna an nih hmanga khel thei Real hmun ruak luahin, Spanish Super Cup an khel dawn.

Barcelona hi La Liga champion an nih avanga inelna hmachhawn tur an ni a, Supercopa de Espana hmachhawn tur zinga club lar lo ber tih ngam Osasuna hi season hmasa Copa del Rey final an luh vanga inelna hmachhawn tur an ni thung.

Hei le Atletico

Atletico Madrid-in an league match hnuhnung berah 4-3 in Girona an ngam lo a, La Liga table-ah pangana dinhmun an luah mek - hemi hnuah hian Copa del Rey round of 32 khelin, CD Lugo chu 3-1 in an hneh a, mahse, an hneh team hi Spanish third division club an ni.

Tun hnaiah Diego Simeone-a naute an che fuh hleithei lo a, an mangchhia mangṭha a, harhtharna chang turin Real Madrid hneh an tum dawn - hei hi an thlentir dawn a nih chuan Lugo laka bench-a bul ṭan Álvaro Morata leh Antoine Griezmann chet ṭhat a ṭul ang.

Morata hian season duhawm tak a hmang mek a, match 25-ah goal 17 khungin assist vawi thum a nei tawh. Kum 32 mi Griezmann hian match 26-ah goal 16 khungin assist vawi thum a nei bawk a, Real tan anni pahnih dan dan tur hi ngaihtuah a ṭul dawn.

Real beiseina

Tun season-a team pahnih an intawn tawhah Atletico-in 3-1 in Real an hneh a, Morata (2 goals) leh Griezmann ten goal an khung ve ve - tun season-a an intawn tawhna ringawt thlirlet chuan Atletico hi an inringtawk khawp ang.

Mahse, Real hian Atletico an ngam loh hnuah league match 13 khel leh tawhin, tlawm an nei lo a, La Liga table chung ber an luah mek - Champions League match ruk an khelhah an chak vek a, Copa del Rey round of 16 an lut tawh bawk.

Carlo Ancelotti nauten season duhawm tak an hmang a, an boruak fuh lai hi Atletico laka chân an duh dawn lo. Tun season-a match 22-a goal 17 leh assist vawi nga neitu Jude Bellingham chet ṭhat a ṭul a, match 26-a goal 11 leh assist vawi ruk neitu Rodrygo pawh en bik hlawh tur a ni.