Celtics hnehtu Pacers

Nimin zing NBA regular season inkhelah Indiana Pacers chuan Eastern Conference hmahruaitu Boston Celtics chu 133-131 in an hneh, an point guard pawimawh Tyrese Haliburton hliam chunga result ṭha an nei hi a lawmawm khawp ang.

Haliburton hi malpui hliam vangin a ṭhian ten khelmual aṭanga an kuah chhuah a ngai a, engtiang chena rei nge a chawlh dawn sawi theih a la ni lo. Pacers hi half time laiin 68-59 in an hniam zawk a, an player ṭha a hliam bawk avangin beisei an nei sang ngam kher lo ang.

Mahse, bench aṭanga lut Bennedict Mathurin chuan point 26 a nei a, player pasarih ngawtin point 10 nei tlingin team thawhhona ṭha leh an ṭanrualna chu an chakna hnar pawimawh ber tia sawi ngam a ni.

Mathurin chuan, "Kan team player zinga a ṭha ber kan chan a, ka chunga mawhphurhna tla kha a lian hle. Ka ṭhiante puih leh hnehna chanpui tumin theihtawp ka chhuah a, player zawng zawng khan an mawhphurhna ṭheuh ṭha takin an hlen chhuak a ni," a ti.

Chak lo mah se Boston Celtics hi Eastern Conference hmahruaitu an la ni tho, tun season kal laiah vawi 28 chak tawhin ṭum riat chauh chak loh an la nei. Indiana chu vawi 21 an chak tlinna niin table-ah pangana an ni thung.

Inkhel dangah Los Angeles Lakers laka tlawm hlim Los Angeles Clipper an rawn tho chhuak. Paul George-a point 25 leh James Harden (19 points) te hmangin Phoenix Suns chu 138-111 in an hneh.

Giannis Anteto-kounmpo chu mimal takin a la khel ṭha. Greek star hian triple-double (25 points, 11 assists leh 10 rebounds) a nei a, mahse a team Milwaukee Bucks chu Utah Jazz lakah 132-116 in an chak lo.

Washington Wizards pawhin Oklahoma City Thunder chu 136-128 in an ngam lo a, tun hnaiah a zawni match nga ngawt an tlawm ta a, insiamṭhat an mamawh takzet a ni.