Raducanu-i coach thar Cavaday

US Open 2021 champion a nih hnu lawka a coach nen an inṭhen a, a hnu lamah coach ṭha leh nghet tak a nei leh tawh lo, tunah chuan Nick Cavaday chu Autralian Open atana a coach a ni dawn.

Britain tleirawl hian season hmasa kha a hmang ṭha lo, a banrek leh kerek hliam vangin a hun tam zawkah a inkhel thei lo. Nikum tawp lam aṭangin a inkhel thei leh tawh a, kuminah chuan Grand Slam hmasa ber pawh a khel thei tawh dawn a ni.

Kum 21 mi Raducanu leh Cavaday te hian hna an thawkdun ṭan tawh. Ningani hian world number 1 hlui Naomi Osaka nen charity match an khel dawn a, coach thar hnuaia a match hmasa a ni ang.

An thawhdun chen tur tak hi sawi chian a ni lo, tunah chuan Australian Open atan tih a ni phawt. British chanchinbu mite chuan Grand Slam hmasa ber hnu lamah pawh an inkawp chhunzawm ngei an rin thu an sawi thung a ni.