Toney-a'n Brentford rulh let a duh

Arsenal leh Chelsea nena sawi zawm hlawh mek, Brentford striker Ivan Toney-a'n a club chhuahsan lam a ngaihtuah lo niin a lang a, hrem a nih chhunga an thlawpna avangin a club hnenah thiltih hmanga lawmthu sawi let a duh.

England international Toney hi Football Association chuan sum thapna lama a lo inhman avangin thla riat chhung inkhel thei lo turin an hrem a, January 17-ah hrem a nihna hi a tuar zo dawn.

Tun hnaiah Toney hian Brentford B team tan match khelin hattrick a siam a, striker mamawh Arsenal thawm a ri ring lehzual hle. Mahse, kum 27 mi striker hian an manager Thomas Frank leh Brentford hnena lawmthu sawi a duh tlat.

Toney chuan, "Thomas Frank hi min ṭanpuitu duhawm tak a ni a, club pumpui hian, an tih ngai loh tam tak tiin ka tan an inpe em em bawk. An thiltih ṭhat rulh tur hi ka ngah em em a, chutianga tihtheih hun chu ka nghakhlel a ni," a ti.

Brentford hian January 20 zanah league match khel turin Nottingham Forest an mikhual dawn a, coach-in a duh chuan Toney hi a chhawr thei tawh ang.

Toney chuan, "Fans ho pawhin min thlawp a, ka inkhelh lo lai pawhin ka hming lamin an zai dual dual a ni. Ka ṭhian pakhat chuan ka hming lama fan-te an zai lai video min rawn thawn a, ka awm tawh lo chung pawha min thlawpna ka hmuh khan ka hmul thi hi a ding sung sung thei hial a ni," a ti.

Season hmasa khan Toney hian Brentford hi league-ah pakuana nihpuiin, league match 33-ah goal 20 ngawt a khung a, Arsenal leh Chelsea neitute chil a tiput hi a awm lo hran lo. Hetihrual hian Brentford boss Frank chuan London club tan Toney lei tur chuan awihawm loh khawpa tam sum thehchhuah a ngaih tur thu a sawi!

Brentford hian season an hmang ṭha lo hle - league match nga a zawnin an tlawm tawh a, table-ah 16-na an nih mek avangin relegation zone an hlat lo.

Mahse, Toney chuan, "Brentford hi tun dinhmunah chuan an talbuai hle. Mahse, ka lo kir hunah chuan an buaina aṭanga khai chhuak turin tha ka thawh theih ka beisei a ni," a ti a, club danga khelh a tum hmel loh hle.