Chhunga goal khung a tawk lo

Indian Super Cup-ah Hyderabad FC tan Ramhlunchhunga'n goal khung mah se, East Bengal lakah a club a chakpui zo lo a, nimin khan Kolkata club lakah hian 3-2 in an tlawm.

East Bengal tan an thiampuipa Cleiton Silva chuan minute 33-naah goal hmahruai a khung a, Kolasib tlangval Chhunga'n minute 45-naah Hyderabad tan a sut.

Goal dang lut loa chawlhlawk hman a nih hnuah, Brazilian striker Silva bawkin East Bengal tan a khung a, Nim Dorjee Tamang chuan Hyderabad tan sut leh mah se, East Bengal tan Saul Crespo chuan chakna goal a khung zui.

Kalinga Stadium-a inkhelah hian Hyderbad tan Mark Zothanpuia, Ramhlunchhunga leh Lalchhanhima Sailo ten inkhel bul an ṭan vek a, an team erawh an chakpui zo ta lo. Nizan khan inkhel dangah Mohun Bagan leh Sreenidi Deccan an inkhel a, result kan hre hman lo.

Vawiinah inkhel pahnih a awm leh dawn a, Kerala Blasters leh Shillong Lajong te chawhnu dar 2:00-ah intawngin, NorthEast United leh Jamshedpur FC te zan dar 7:30-ah an intawng ang - JFC hian season tawp thlenga an coach turin Khalid Jamil an la lut a, Aizawl FC boss hlui hian ISL-a a club hlui NorthEast United hneh hi a châk khawp ang.