EPL-ah Osimhen a hlawhtling ang - Adebayor

Arsenal leh Manchester City striker hlui Emmanuel Adebayor chuan Victor Osimhen a dah sang hle a, African Footballer of the Year hi Premier League-ah hlawhtling taka a khelh theih ngei a ring.

Nigeria international Osimhen hian season hmasa khan Serie A goal 26 khungin Napoli chu Italian champion a nih pui a, kum 33 hnua an champion lehna hmasa ber a nih avangin an ngaihlu hle.

European club lian tam takin Osimhen hi lakluh an duh, mahse rin loh tak maiin Naples club tan kum 2026 thleng daih contract thar a ziak ta zawk. Amaherawhchu club dangin an la hel reng a, chhuak mai thei dinhmunah a la ding.

Osimhen beiseitu zingah Premier League club hian Arsenal leh Chelsea te hming pawh a ri. Adebayor chuan, "A rilru puthmang a dik a, chuvangin England-ah a hlawhtlin theih ngei hi ka ring tlat.

"Premier League khel ngei turin ka duhsak bawk, a theihna sang leh danglam tak hi a lan tir a ngai a ni," tiin English football chu atana ṭha tur niah a ngai.

Tun hmain EPL-ah hian African striker Adebayor, Didier Drogba leh Yakubu te chu hlawhtling takin an lo khel tawh ṭhin, an sulhnu zui turin Osimhen hi a duh.

Thlasik bazar lai a ni a, sum tam tak hmang ngam tan chuan Osimhen hi lei theih pawh a ni mai thei. Mahse, tuna a lan dan chuan London club pahnih hi chuan thlasik ai chuan nipui bazara sum hman tam an tum niin a lang.