Wembley-a Holland hneh lotu England

Germany laka comeback ropui lantirtu England-in Wem-bley stadium-ah Nether-lands nen friendly match khelin an inlehthal tir a, mikhual team lakah Thawhlehni zan khan 1-2 in an tlawm.

England tan Germany 3-2 a an hneh ṭuma goal khungtu Jamie Vardy bawkin goal a khung leh a, Leicester City stri^-ker hian minute 41-naah team goal a khung.

Mahse, second half ṭan aṭanga minute 50-naah Dan-ny Rose-a kut ball-in a per avangin Netherlands-in penalty an hlawh chhuak a, Vincent Janssen chuan an si phurh sut nan goal-ah a chantir.

Kum 21-a upa striker pa-lian hian minute 77-naah Phil Jagielka dah ṭhain Luciano Nar-singh tan a siamsak a, Indian thisen kai Narsingh-a'n a hun ṭha neih a bawhpelh duh lo a, goal-ah a chantir.

England-in Netherlands goal hnihna luh danah Jagielka lakah AZ Alkmaar striker Janssen-a foul niin ngai mah se referee-in ngaihdan dang a nei a, England lung-awi lohnain awmzia a nei thui lo.

Total football

Wembley stadium-a inkhel-ah minute 14-naah Dutch legend March 24-a thi ta Johan Cruyff hriatrengna hun hman a ni a, 'total football' larpuitu Johan Cruyff hriatrengna hun hman zanah England-in chak lo mah se an goal khat luhnaah total football an lantir.

Everton defender John Stones-a'n captain James Milner hnena ball a pek chu Liverpool winger hian Netherlands goal lamah a tlan phei pui a, a ball cross ṭha tak chu Daniel Sturridge-a'n mawi takin Adam Lallana tan a kap karah a luh phei tir.

Southampton-a a vanglai ang maia khel chho leh mek Lallana-a'n mawi taka ball a chawh kual hnuah Kyle Walker a pe phei a, Tottenham Hotspur defender hian Vardy tan siamsakin Foxes striker tan goal khung harsa a ni tawh lo.

Vardy a ropui

Leicester City tana tun sea-son-a khel ṭha tak Jamie Vardy-a'n striker class sang a nihzia a pholang leh ta a, goal khat a khung bakah Netherlands tlarhnung vawi tam chhaih mangangtu a ni.

Kum 29-a upa striker hi Hodgson-a'n England squad-ah eng angin nge a hman ang? tih hi zawhna awm fo a ni a, Harry Kane, Daniel Sturridge leh Wayne Rooney-te awmna team-ah first eleven a chan theih dawn leh dawn loh chung-changah zawhna a awm mek.

Germany leh Netherlands a hmachhawn danah erawh vardy-a'n striker ṭha neih tur ang a nei tih a lantir - tharum a ngah a, ball a thiam a, hmun awl insiam a thiam a, Premier League defender-te sawisatu striker hi Euro 2016-a defender-te sawisa turin a ṭha tawk.

Jamie Vardy-a'n England tan starting eleven a chan theih dawn leh dawn lohah inhnialna hi chu Euro 2016 hma chuan a awm rengin a rinawm a - France-ah a zin ngei dawn tih erawh a inhliam a nih loh chuan a chiang ta.

Tlarhnung buai

England-in Germany lakah goal thum an khung avangin tlarhma lamah harsatna an nei lo tih a lang a, an buaina nia lang erawh an tlarhnung hi a ni.

Germany laka goal hnih an chhuah hnuah Netherlands lakah goal hnih an chhuah leh ta a, tlarhma lama Vardy, Harry Kane leh Daniel Sturridge-te neitu team hian tlarhnungah player ṭha an mamawh niin a lang.

Everton defender beiseiawm John Stones-a'n tawnhriat a la ngah tawk lo tih khelmual chhungah a lang a, Chris Smalling leh Danny Rose-te'n an hnathawh tur an thawk ṭha tawk lo bawk.

England defender zingah Kyle Walker chiah khel ṭha awm chhun a ni a, Spurs defender hian tlarhnung a puih ṭhat tluk zetin tlarhma a pui ṭha a, Euro 2016-ah inkhel bul a ṭan ṭhin a nih pawn a mak lo ang.

Hodgson-a thukhawchang

England boss Roy Hodgson chuan, "Kan khelh danah ka lawm lo a, Germany laka kan khelh dan kan phak lo hle a ni. Game thunun mah ila awmze neiin ball kan chang tam tawk lo a, Germany laka kan khelhdan ngaihtuah chuan a lawmawm lo a ni," tiin an theihna zawng zawnga an khelh chhuah loh thu a sawi.

Hodgson chuan referee thu-tlukna a dik tawk lo nia sawiin, "Player-in tih luih vanga ball a khawih a nih loh chuan penalty turah ka ngai lo a, mahse referee-in a ham miau si. Netherlands lamin an goal hnihna an khung danah pawh referee-in a hnathawh tur a thawk ṭha tawk lo a, kan tuar a ni," tiin referee chungah a lawm lo hle.