Toure a chhuak ang - agent

Yaya Toure chuan Man-chester City a chhuah-san tur thu a agent Dimitri Seluk-a'n a sawi a, Ivory Coast international hi Europe club lian zing-ah beiseitu an la ṭhahnem hle tih a sawi bawk.

Kum 32-a upa Toure contract neih lai hi 2016-17 season tawp rual khian a tawp tawh dawn a, tun season tawp hmaa a contract hi pawh sei a nih loh chuan Etihad Stadium a chhuahsan tur thu sawi a ni. Paris Saint-Germain, Bayern Munich leh Juventus te chuan Toure hi an ngaihven niin thu a thang mek bawk.

Transfer chungchang sawiin Seluk chuan, "Tun dinhmunah City hian engmah an la sawi ri lo a, season thara a khelhna tur kan ngaihtuah ṭan mek a ni. Tunah rih chuan a club tan hian a theihna zawng zawng a hlan rih," tiin a sawi.

Season thar aṭang chuan City hian manager thar Pep Guardiola an nei tawh dawn a, Toure hian Barcelona-a a lo hrawn tawh Spanish manager thuhnuaia awm nawn hi a chak vak lo bawk niin a lang.

Tun season-ah Toure hian Premier League match 26 khel tawhin a team chu season thara Champions League khel phak chin palina dinhmun a luah pui mek.