A tawp khar nan India chak lo
India tan FIFA World Cup khelh beisei phak chi a la ni lo. Thawhlehni zan khan Kochi-ah Stephen Constantine-a hoten anmahni ang bawka 2018 FIFA World Cup khelh beiseina nei tawh lo Turkmenistan chu 1-2 in an hneh lo.
India hi chak pawh ni se awmzia a awm tawh vak lo a, point thum an hmuh chuan 2019 Asian Cup khel tur zawnna playoff-ah an tumpui a awlsam phah mai thei tih zawng a ni. Turkmenistan erawh point 13 hmuin Group D-ah pathumna an ni a, Asian Cup qualifying third round an khel thung ang.
Tlarhnung nawi
India team-ah fak tur an tlem a, an tlarhung pawp nasa lutuk chu an chak loh chhanah a ngaih theih. Minute 20-na lekah Bagan defender Pritam Kotal-a'n ṭul lo takin Arslan Amanov lakah penalty a chawi a, penalty hlawh chhuaktuin goal zawnah a pet lo.
First half aiin second half-ah India tlarhnung a pherh a, minute 49-naah school naupang ang maiin Sandesh Jhingan leh a hote an khawsa a, Didar Durdiyev cross mawi tak chu awlsam takin Amanov-a'n a tauh lut. Minute 70-naah substitute Serdaraly Ataýew-a'n India keeper Gurpreet leh defender-te bum dualin chakna goal a khung.
Hun tawp dawn hnaiah Aby-lov Guvanch-a'n Indian mid-fielder Augustin Fernandes leh Narayan Das te bum mah se keeper Gurpreet-a'n India mualpho lutuk tur a chanhim.
Beiseina thamral
India tan Mizo tlangval Jeje Lalpekhlua chuan a vawi hnih nan captain armband a hreng a, minue 27-naa Sandesh Jhingan-a tauh goal hmangin beiseina an nei sang hman hle. Amaherawhchu second half-ah India player-te an chau tih a hriat a, khualmuala an hneh lohna ang zat bawkin Turkmenistan 2-1 in an hneh lo.
Mizo zinga India captain hmasa ber Jeje-a chuan, "Iran khaw vawt aṭanga rawn haw hlim kan nih avangin boruak lum leh uap lutuk kha kan zo lo a ni. Second half-ah kan tha a zo vek a ni berin ka hria," tiin an chak loh chhan a sawi.
India hian Iran nen match harsa tak an hmachhawn laiin Turkmenistan hi an lo âwl thung a, hei vang hian second half-a mualneitu an talbuai hi a mak lo.
Mohun Bagan striker Jeje chuan sawiin, "Match hnih kan chak loh aṭangin zir tur tam tak kan nei a, nasa lehzuala ṭan kan mamawh a ni," tiin inhmuhchhuah nan hman an tum thu a sawi.
Jeje hian Kolkata Derby khel turin Siliguri lam a pan nghal a, Inrinni tlai dar 4:30 hian Mohun Bagan leh East Bengal te Kanchenjunga Stadium-ah an intawng ang.