Djokovic-a'n Thiem hneh hram

Miami Open khelh mekah mipa player langsar ṭhenkhatin beisei an phak lo a, seeded pakhatna Novak Djokovic pawhin Thawhlehni zan khan Dominic Thiem lakah quarterfinal lut turin fiahna hautak tawng mah se a paltlang hram. Rafael Nadal leh Andy Murray te chu an lo tla tawh.

Crandon Park-a fourth round inkhelah world number 1 Djokovic hian 6-3, 6-4 in darkar khat leh minute 49 chhungin hnehna a chang. Point en mai chuan Serbian thiampuipa hi awlsam tak a chak angin lang mah se world number 13 lakah hian awlsam takin hnehna a chang bik lo.

ATP ranking a sang zual 20 zinga naupang ber kum 22-a upa Thiem hian Djokovic service a chhaih buai hneh hle a, break points vawi 14 ngawt a hmu thei. Mahse Austrian tlangval hian a hun ṭha neih hi vawi khat bak a chhawr ṭangkai thei lo thung a ni.

Miami Open nomawi vawi nga lo chawi tawh Djokovic chuan, "Straight-set in hnehna chang mah ila inkhel hautak leh harsa tak a ni. Thiem khan sir tak tak na zet zetin ball a rawn vaw phei ṭhin a, ka tan a hautak thei hle. Tlan tam tir ka tum a, ka chiai duh loh vangin ka vannei hram a ni," tiin a khingpui chu awlsam taka a hneh bik loh thu a sawi.

Quarterfinal hi tukin zing dar 6:30 hian khelh chhunzawm tur niin Djokovic hian Tomas Berdych a hmachhawn zui ang a; Nick Kyrgios leh Milos Raonic te an inkhel bawk ang.

Thawhlehnia inkhel dangah seeded pasarihna Berdych chuan Richard Gasquet lakah 6-4, 3-6, 7-5 in hnehna a lo chang tawh a, Australian Nick Kyr-gios pawhin a vawi khat nana Masters 1000 quarterfinal khel thei turin Tim Smyczek chu 7-6, 6-3 in a lo hneh tawh bawk a ni.