Messi-a'n Argentina tan goal 50 khung tling ta
Lionel Messi hi mi tam tak-in Argentina tana khel ṭha tawk lo tiin sawisel ṭhin mah se a goal khung zat chhut tan chuan Barcelona thiampuipa hi dah hniam theih a ni lo ang. Messi hian Thawhlehni zan khan ram tana a goal 50-na khungin an mikhual Bolivia 2-0 in an hneh.
Santiago-a South America World Cup qualifying inkhelah Chile lakah chakna goal lo khung tawhtu Gabriel Mercado chuan minute 20-naah goal hmahruai khungin Argentina hma a hruai pui. Ever Banega chuan goal khungna hun ṭha nei chhunzawmin goal ban a pet per dawp a, Sevilla midfielder hian penalty a hlawh chhuak zui bawk. Penalty pet tur hian captain Messi rawn ding chhuakin goal-ah a chan tir zui.
He inkhel result avang hian Argentina chuan match ruk an khelh tawh aṭanga point 11 hmuin an chungah hian point 13 hmu thei ram pahnih Uruguay leh Ecuador te chiah an awm tawh.
Messi a ropui
Mi tam takin khawvela footballer piang tawh zinga ropui bera an ngaih Messi hian Argentina chu nomawi lian tham la chawi pui lo mah se a chanchin sawi nep theih a ni lo. Kum 28 chauha upa ni chungin ram tan match 107 a khel der tawh a, goal 50 khung tling tawhin Gabriel Batistuta (56) chiah tluk loh a nei tawh. Diego Maradona (34) aiin goal 16 zetin a khung tam tawh zawk a ni.
Barcelona thiampuipa hian Catalan club leh Argentina tan inelna hrang hrangah goal 499 teh meuh a khung tawh! Tunkar tawp hian El Clasico khelh a ni dawn a, Messi hian goal a khung thei a nih ngat chuan mel lung pawimawh a phun dawn a ni.
Brazil chak zo lo
Dunga kaihhruai Brazil-in beisei angin World Cup qualifying an khel ṭha lo a, match ruk an khelh tawh
aṭangin vawi hnih chiah hnehna an la chang thei a. Thawhlehni zan khan goal hnih an phurh zet hnuah Paraguay chu 2-2 in an inhnehtawkpui hram.
Table-a pasarihna luahtu Paraguay hian Dario Lezcano leh Edgar Benitez te goal khung hmangin hma an hruai a, minute 79-naah Ricardo Oliveira chuan an si phurh a sut ṭhen hram. Brazil hi chak lo zawk tura ngaih ni tawh mah se hun pek belhah Dani Alves chuan goal pawimawh khungin point khat hlu tak a hlawhchhuah pui.
Brazil hian point kua hmuin table-ah parukna dinhmun an luah a, hmahruaitu Uruguay chu point liin an phak lo mek.
Inkhel dangah Uruguay chuan Edinson Cavani goal khat khung hmangin Peru an hneh. Paris Saint-Germain striker hian an match hnuhnung zawkah Brazil lakah goal a lo khung tawh bawk. Anni hian match ruk khelh tawh aṭanga point 13 hmuin hmahruaitu an ni mek.
2018 FIFA World Cup qua-lification (CONMEBOL) match sarihna chu Sept 1 khian khelh chhunzawm leh a ni ang.