Ka tan hun pawimawh bik a ni - Saina

Thla ruk chuang ke nain a tih buai tawh Saina Nehwal chuan tunlaia a hun tawn mek chu a tan a pawimawh bik hle a hriat thu leh hlawhltinna chang tur chuan a rilru bakah a taksa pawh tun hma aia a tih chak nasat a ngaih thu a sawi.

Nikum August thla a neih World Championship-ah khan Saina hi pahnihna a ni a, hemi hnu hian China Super Series Premier khelin hliam vangin beisei a phak lo. Indian shuttler hian a ke na vangin Hong Kong Open a khel lo a, BWF World Super Series leh Premier Badminton League (PBL)-ah te inlan ve mah se a hliam a dam thei tak tak lo.

2012 Olympics bronze medallist Saina chuan, "Ka ke leh ngalah hliam ka neih avangin ka buai deuh reng a, ka hliam hian beisei aiin hun a duh rei hle. Heivang hian tournament khelh duh ṭhin mah ila inbuatsaihna ka nei mumal thei ngai lo," tiin a sawi.

Saina chuan sawi chhunzawmin, "Ka hun tawnah chuan a harsa leh hautak lai a ni a, paltlang theih ngei ka inbeisei. Olympic-a medal lak hi tun hma ai khan a hautak tawh dawn a, rilru leh taksa fit ṭha zawk neih a ngai dawn tih a chiang," a ti.

Saina hi India Open Super Series champion lai a ni a, tunkar chhunga neih tur he inelnaah hian a champion title humhim theih ngei a inbeisei thu a sawi bawk.