Portugal chakna Ronaldo leh Nani
Cristiano Ronaldo leh Nani te goal khung hmangin Portugal chuan Thawhlehni zan friendly match inkhelah an mikhual Bel-gium 2-1 in an hneh.
Estadio Dr Magalhaes Pessoa, Leiria-a inkhelah Portugal tan Manchester United player hlui pahnih an langsar a, minute 20-naah Nani chuan midfielder Andre Gomes hnen aṭanga a ball hmuh chu rang zetin a khung. First half tawp hma hretin Ronaldo a rawn inlar a, Joao Mario cross ṭha zet mai chu Real Madrid hmatawng hian hnai set sawt aṭangin a tauh lut, Belgium keeper Thibaut Courtois a che hman lo chiang hle.
Kum 31-a upa Ronaldo hian a zawnin international match li chhung goal a khung lo a, an match hnuhnung bera Bulgaria 1-0 a an hneh loh
ṭumin penalty a chhuih lut lo nghe nghe. Mahse, tunah erawh a ze ngai a chhuah leh ta. Second half-ah Bel-gium striker Romelu Lukaku chuan a unaupa Jordan siamsak hmangin goal khat khung ve mah se inkhel result a thlak danglam phak tawh lo.
Belgium hi FIFA ranking-ah pakhatna dinhmun hauh mektu ni mah se hliam vangin an player pawimawh Vincent Kompany, Eden Hazard, Kevin De Bruyne, Christian Benteke, Jan Vertonghen leh Toby Alderweireld an chhawr theih loh an tuar tih a lang.
Portugal hian Euro 2016 ṭan hmain friendly match vawi thum an la khel dawn a, Norway, England leh Estonia te an la khel leh dawn. Belgium pawhin Switzerland, Norway leh Finland te an la hma-chhawn ve leh bawk dawn a ni.
Eng nge an sawi?
Portugal coach Fernando Santos chuan, "Inkhel ṭan tir minute 10 chhung vel kha chuan Bulgaria nen kan inhmachhawn ṭum ang mai khan thil a thleng leh dawn niin ka hre hman. Courtois a khel ṭha em em a, goal ngei tura ngaih pawh a dang hman zel. Mahse goal kan khung tak avangin inkhelh a awlsam phah. Second half-ah goal khung belh tawh lo mah ila ka nauten an khel ṭha tluan. Euro-a ṭha taka inlan tur chuan kan thawhrim zual ala ngai hle," tiin a sawi.
An khelh ṭhat tawk loh thu sawiin Belgium coach Marc Wil-mots chuan, "Player hliam kan neih nual avangin insiksawi a ngai a, kha khan inkhelh a ti harsa. Chu bakah ball chan tumin kan tlan tam tawk lo a, hmunawl kan siam sak fo bawk. Kan harhchhuah meuh chuan a tlai tawh a ni," a ti.
Turkey tan Turan
Thawhlehni zan inklhel dangah Barcelona midfielder Arda Turan chuan Austria lakah goal danglam a khung a, Turkey-in khualmualah 2-1 in hnehna an chang.
Austria tan Zlatko Junuzovic chuan minute 22-naah goal hma-hruai khung mah se Turkey hian chawlhlawk hma chiahin Hakan Calhanoglu hmangin an si phurh an sut. Second half-ah Austria goalkeeper Ramazan Ozcan-a ball pet chhuah lo dawng fuhtu Turan chuan meter 25-a hla aṭangin cool takin a pet lut a ni.
Turkey hian tunhnaiah a zawnin match 13 chhung hneh loh nei loin an khel tluang tawh a, 2014 November thlaa Brazil an hneh loh hnuah chak loh an la nei leh miah lo.