Zanin India inlan hun - Virat Kohli Vs Chris Gayle
Zanin dar 7:00-ah Wankhede Stadium, Mumbai-ah India leh West Indies ten World Twenty20 2016 semifinal an inkhel dawn. Khawvela batting lineup nei ṭha ber pawl inhmachhawn tur hi cricket ngainatute hmuh châk a ni.
Mualneitu India-in ṭum dang ang bawkin Virat Kohli an hma-chhuan leh ang a, Windies-in Chris Gayle an neih ve tho avangin an zam bik lo ang - zaninah a ruh no zawk an chhuak ang.
India zinkawng
World Twenty20-ah a thlengtu ram la champion ngai lo mah se tun ṭumah erawh champion turin India beisei ber an ni a, tournament ṭan hmaa an khelh dan nena ngaihtuah chuan a awm lo hran lo.
India hian World Twenty20 hmain Australia chu series-ah 3-0 in an hneh a, Aussie khelmuala Kangaroos dah nil thei hmasa ber an ni. Australia an sawp hnuah India-in Sri Lanka chu 2-1 in an hneh leh a, Asia Cup-ah an champion zui bawk.
Mahse, World Twenty20-a an match hmasa berah New Zealand lakah beisei loh takin an mualpho a, an tlu rei lo - Pakistan, Bangladesh leh Australia-te a zawnin an hneh leh vek a, semifinal an lut.
Hriatthiam har Windies
West Indies-in an match hmasa bera England an hneh hnuah Sri Lanka leh South Africa an hneh chhunzawm a, team ṭha tak vek an hneh avangin Windies hi champion tur hiala beisei hman an ni.
Mahse, an match tawp berah West Indies-in chak hmel la hmu lo Afghanistan an hneh lo a, an thiampuipa Chris Gayle chawlh hahdamtir mah se an player dangte enin Afghanistan laka tlawm tur an ni lo - an match hnuhnung bera chak lo team hi India-in an zuam phah sawt ang.
Tu nge khel dawn?
India-in an match hnuhnung bera Australia an hneh ṭumin Yuvraj Singh a inhliam a, Karnataka batsman Manish Pandey chu India squad-ah koh nghal a ni. Manish Pandey hi a inlan kherin a rinawm chuang lo a, kum 34-a upa Yuvraj hmunruak hi squad-a awm sa Ajinkya Rahane chuan a luah a rinawm.
Rahane hian ODI-ah India tan khel ṭha ṭhin mah se T20-ah erawh a theihna tak tak a la pholang a, tun inelnaah hian khelmual chhungah a hmel a la lan lo.
West Indies-in Afghanistan an hmachhawn ṭumin an thiampuipa Chris Gayle-an chawlh hahdamtir a, semifinal-ah kum 36-a upa batsman hian Johnson Charles nen batting lamah bul an ṭan ang. Windies captain Darren Sammy-a rilru tibuaitu tur erawh an middle order batsman-te an che hleithei lo hi a ni a, Chris Gayle-a chet ṭhat leh ṭhat lohah he team hi an innghat thui hle.
Thawnthu Hlui
Team pahnih hi tun hmain T20-ah vawi li an inhmachhawn tawh a, vawi hnih ve ve hnehna changin an inngam tawk hle.
ICC World T20 inelna bikah team pahnih hi vawi thum an lo inhmachhawn tawh a, Caribbean team Windies-in vawi hnih hnehna changin India vawi khat an chak a, West Indies an chungnung zawk.
Chris Gayle-a'n T20 bikah Indian bowler-te a ngam hle a, vawi thum India a hmachhawn tawhah run 154 siamin match tina run 51.33 siam ziah ang a ni.
Bowling lamah Dwayne Bravo-a'n T20 match-ah bik India a hmachhawn pathumah wicket nga a la thei a, a khelh ṭhat ber ṭumin run 38 chiah pein wicket li a la. Kum 32-a upa bowler chet ṭhat leh ṭhat loh hian Indian batsman-te dinhmun a hril thui khawp ang.
Kohli vs Gayle
India-in Virat Kohli an neih an inchhuanpui a nih chuan West Indies-in Chris Gayle an neih ve tho a, batsman pahnih hi tunlai khawvela batsman hmuhnawm ber pawl an ni.
Chris Gayle-a'n match hmasa bera England an hmachhawn
ṭumin ball 48 lekah run 100 a vaw chhuak a, English bowler-te a chhaih mangang hle. England an hneh hnuah erawh Gayle-a'n match khat chiah a khel a, South Africa lakah run li chiah a siam.
India thiampuipa Virat Kohli-a'n India tan match li a inlanah run 184 a siam tawh a, Super 10 aṭanga inelna bul ṭan ram pariat batsman zingah run a siam hnem ber.
Delhi tlangval hian Australia nen semifinal luh an inchuhna inkhelah ball 51-ah run 82 siamin a tawp thleng a dam a, an hmelma kum hlun Pakistan lakah ball 37 chiah hmachhawna rrun 55 siamin a tawp thleng a dam bawk a, inkhel boruak sangah a rintlak zia a lantir ṭhin.
Gayle-a thukhawchang
T20 international match 48 a khelh tawha run 1,510 siamtu Chris Gayle chuan, "Afghanistan lakah hnehna chang lo mah ila kan tan chuan kha kha inzirna ṭha tak a ni. India pawhin an game hmasa ber an hloh hnuin ropui takin an lo kir a, chutiang chu keini pawhin kan ti ve thei a ni," tiin India lakah chak a inbeisei hle.
West Indies batsman chuan Virat Kohli fak nghalin, "Heti tak maia Kohli a che ṭha hi mak ka ti lo a, hun rei tak chhung chu khawvela cricketer ṭha ber pawl a nih tur thu hi ka lo sawi tawh ṭhin," tiin an khingpui batsman a fak.