A hun a thleng ta Mission Veng beisei tawp zan?

Tuikual South-in Mizoram Super League semifinal game 1-a second 54 chiah a awm tawh tihin Mission Veng Vikings lakah point 20 in hma an hruai. Phengphehlep tiha an koh duat Tuikual South ṭan-tute chuan Vikings ṭantute haw laiin 'in haw thei' tihin an au el a, an vaia ding rualin an 'bye bye' bawk.

Phengphehlep ṭantute chet dan hi game 2 boruak san nan a tawk viau a, amaherawhchu quar--t-er tawp bera Vikings guard Lalnunpuia leh Tuikual South guard Hmingmawizuala te insualin inkhel a tinung sawt dawn. Buaina bul tumtu player pahnih bakah TKS center MS Dawngzela Chenkual te an khel dawn lo a, Phengphehlep coach KC Lalliantluanga'n a naute a ho thei dawn lo bawk.

Hawla Indoor Stadium-a inkhelh hun hi zan dar 8:00 a ni a, boruak sang sa a nih avangin mipui tan ṭhutna ṭha chang turin kalhma a ṭul dawn a, MBBA tan security lamah
ṭha zawka ruahmanna siam a ṭul ang.

Mission Veng-in auh el an duh tawh lo, chhan chhuak turin nimin khan Gujarat center Dishant V Shah a vawi hnih nan an chah lut.

Final Ticket

Phengphehlep ṭial mawite' tiin Tuikual South ṭantute an au leh leh dawn. TKS hian league round inkhel hmuhnawm takah 81-77 in Vikings hi an lo hneh tawh a, semifinal game 1-ah 77-62 in an hneh leh bawk. An inkhelh hmasak zawk ṭumin inkhel a hmuhnawm zawk a, a vawi hnihna boruak a sang zawk.

Tuikual South tan game 1-a inhliam chunga khel F. Zodinthara a dam ṭha tawh a, Armed Veng center Vanchuangpuia'n khelh chhiat tak tak a nei lo a, tun thleng chuan MVP tana thlan awm a ni.

Phengphehlep lawmna tur chu MSL1-a point ngah ber Mapuia Zote-in game 1-ah a thiamna a pholang tawh a, ani ang bawka player thar K. Vanlalruata a rintlak bawk. Player ṭangkai zingah Lal-rohlua thawhrim zia sawi hmaih theih a ni lo a, Tuikual South tlangval hi an veng tan a ṭangkai a ni.

Tuikual South hian an inkhelh hmasak ṭumin MSL2 match zawng zawnga defending game ṭha ber an khel a, an khelh nawn leh theih chuan final ticket an nei theih a rinawm.

Beiseina

Game 1 hun tawp lamah Vikings guard Lalrina Renthlei kut a kal ṭan chiah a, hun tawp lamah a zawnin point thum a lut. Tuikhuahtlang tlangval hian Game 2-ah a chetṭhatna hi a chhunzawm a nih ngat chuan semifinal game 3 kan hmu ang.

Chutihrualin basketball hi team game a ni a, mimala tih theih a ni lo. MSL1-a most defensive player Moses Zoremmawia leh Lalrinkima te'n Lalrina an thlawp ṭhat a ṭul dawn a, Tuikhuahtlang tlangval hian ama puala show a kalpui thei lo a nih chuan veteran player Lalrempuia bakah Lalruatkima Sailo leh Lalmuanawma ten mawh-phurhna an lak ngam a ṭul dawn. Guard Nuna a tel theih dawn loh avangin TKS forward K-a u Albert K. Lalmuanpuia'n Vikings tan a thiamna a lantir a ṭul ang.

Mission Veng tan thu lawmawm ber chu Dishant awm tur hi a ni. Gujarat center palian hi Tuikual South an hmachhawn hmasak ṭum-in Mizo zinga a tel hmasak ber a nih avangin a talbuai deuh a, chutichung chuan point 20 bakah rebound vawi 10 a nei thei. Vikings hian Dishant-a hoin champion lai Khatla TBL leh Chaltlang Ryders an hneh zui a, tunah chuan Mission Veng mipui tam zawkin Tuikual South an hneh lai an mitthla ṭan in a rinawm.

Buai phah lo

TKS coach KC-a chuan, "Hrem tuar tur zawk chu Vikings an ni. Duthusam chuan vawi khat chaktir ve phawt a, chuan kan player hrem te hi kan chhawr vat thei ang. Amaherawhchu chak chiang a awm theih loh avangin tunah chak nghal kan duh," tiin chak tuma an khelh tur thu a sawi.

Vikings coach Reuben Lalchhan-dama chuan, "Player hrem an tam zawk a, keini aiin hremna hi an tuar zawk ang," tiin a sawi thung.

Team pahnihin hrem vanga buai an duh lo a, an rilru put hmang hian semifinal a ti ngaihnawm ang.

Buai duh lo.

Coach pahnihin basketball game an ngaina a, buaina vanga a hmel hem an duh lo.

Tuikual South coach KC-a chuan, "Min ṭantute chu chet nat an tum. Amaherawhchu buaina siam zawng ni loin hlim takin inkhel tiphur zawngin a ni ang. Boruak ṭha awm se tih hi kan duh dan a ni," a ti.

Mission Veng coach ChD-a chuan, "Ṭantu kan nei ṭha ve ve a, inkhel awm dan a zirin boruak ṭha lo thleng thei a ni. Hetiang hunah hian mahni invawn theih a pawimawh a, player leh mipuiin discipline ṭha an neih a ṭul a ni. Kan inkhel mipuiin an bengkhawn tih kan hriat avangin kan lawm a, kan practice thlengin min ṭawiawm ṭha a, min ṭantute tih beidawn kan tum lo ang," tiin a sawi ve bawk.