World champion Germany nge nge!

Berlin-ah Germany-in an hmelma England hneh lo mah se Munich-ah Italy 4-1 zeta an sawp avangin 2014 FIFA World Cup champion hi European Championship-ah dah hniam theih an ni lo ang.

Germany tan Toni Kroos-a'n (24') goal hmahruai khungin Liverpool nena sawi zawm Mario Gotze-a'n first half tawp hma chiahin goal hnihna a khung a, second half-ah leftback Jonas Hector (59') bakah Mesut Ozil-a'n (75') penalty aṭangin goal lina a khung. Italy mualpho lutuk tur khuh mawi nan Stephan El Shaarawy chuan minute 7 a la awm tihin goal khat a khung ve hram.

Germany hian June 21, 1995 khan friendly match-ah Italy hi an hneh a, tun ṭum friendly match hi an chak lehna hmasa ber a ni. Italy hian 2006 World Cup semifinal leh 2012 Euro semifinal-a Germany an lo hneh tawh avangin tun ṭum result hi Joachim Low hote tan chuan chanchin lawmawm bik a ni.

Goal hnihna khungtu Gotze hi nikum October 8 khan a inhliam a, hemi hnu hian Bayern Munich tan minute 53 chiah a la khel a, Germany tana hmun pawimawh chang turin club tan minute tam zawk a inlan a ṭul ang.

Germany coach Jow Joachim chuan, "Mario Gotze hi a inhliam avang leh Bayern squad a chhah avangin Pep Guardiola hnuaia a khel tam lo hi a mak lo. Tunah erawh a thawkrim a, amahin training-te a nei a, a goal khung avang hian inrintawkna neih phah se ka ti hle," tiin FIFA World Cup-a champion-na goal khungtu chungchang a sawi.