ICC World Twenty20 Kiwis hnehtu England-in final an lut

Nilaini zan khan England chuan World Twenty20 semifinal-ah New Zealand chu wicket sarihin an sawp a, an ram chanchina a vawi hnih nan World Twenty20 final an lut ta.

March 9, 2015-a ODI World Cup group stage aṭanga Bang-ladesh-in an hnawhchhuah Eng-land tan hei lo liama comeback ropui a awm chuang lo.

Semifinal khelh a nih hmaa Delhi khelmuala an tlangnel tawh zawk thu sawitu English bowler Ben Stokes-a'n a thu-sawi a takin a lantir a, over li a vawmah run 26 chiah pea wicket thum lain Feroz Shah Kotla khelmual an hre bel tih a chiang hle.

He inkhela hmuhnawm ber erawh Jason Roy a ni a, Super 10-a beisei a phak loh avanga sawisel hlawh tak batsman hian ball 44 a hmachhawnah run 78 a siam a, bowler nei ṭha New Zealand meuh pawhin an chelh zo lo.

Inkhel chu

Bat hmasa zawk New Zea-land-in over 20-ah run 153 siamin mi pariat an hloh a, ball 32-a hmachhawna run 46 siamtu Colin Munro chu Kiwis batsman zinga run siam hnem ber a ni.

Black Caps batsman zingah run 32 siamtu captain Kane Williamson leh run 28 siamtu Corey Anderson-te an khel
ṭha bawk a, mah se an middle order batsman-te an chet ṭhat loh avangin over 10-a run 89 siama mi pakhat chiah hlohtu team hian run 153 an tlin hram.

Batsman-te chet ṭhat vanga semifinal thleng thei ang hiala an sawi England bat hun a thleng a, Super 10-a South Africa laka an target run 230 um phatu England batsman-te tan an target hi um huphurhawm a ni lo.

England opening batsman run 78 siamtu Jason Roy leh run 20 siamtu Alex Hales-te out hnuah captain Eoin Morgan chu run siam loin out mah se England-in Joe Root leh Jos Buttler an la nei cheu a, Black Caps tan tih theih a vang.

Joe Root hian ball 22 a hma-chhawnah run 27 a siam a, Jos Buttler-a'n ball 17 a hmachhawnah run 32 zet a vaw chhuak bawk a, chak phu zawk England-in hnehna an chang.

Khelmual thara buai Kiwis

Nikum World Cup-ah New Zealand-in khel ṭha hle siin final-ah Australia an hneh lo a, Kiwis talbuai chhan hi an khelh ṭhan lohna Melbourne Cricket Ground-a an khelh vang nia ngaih a ni.

Nilaini zana an inkhelhna Feroz Shah Kotla khelmualah New Zealand-in tun tourna-ment-ah match an la khel lo a, Eng-land-in match hnih lo khel tawhin hnehna an chang ve ve thung.

Kotla hi bowler aia batsman-te chet ṭhat ṭhinna khelmual a ni hrim hrim a, an batsman-te ai maha bowling lama innghat thui zawk Black Caps-in an batsman-te a innghat tak England an hmachhawn hi an vanduai hle.

New Zealand hian England an hmachhawn hmain run 126, 142 leh 145 an siamte chu an khingpuite lakah humhim mah se England hmaah meuh chuan run 153 an siam chu an bowler-te'n an hum sak zo lo.

World Twenty20-ah hneh loh tawng loa champion an la awm ngai lo a, hneh loh tawng loa semifinal lut awmchhun New Zealand ber an tlak leh tak avangin

World Twenty20 record hi khum lohin a la katluang rih zel ang.

Eng nge an sawi?

England captain Eoin Mor-gan chuan, "Hei aia ṭha zawka khelh dan a awm chuang lo. Inkhel bul kan ṭan ṭha lo kan ti a ni mai thei a, mah se kan sual let dan erawh a ropui thlawt a ni. Tournament lian thama final luh hi naupan lai aṭanga kan châk ṭheuh a ni a, kan final kalkawngah player zawng zawngte inpekna leh thawhrimna hi fak tlat a ni. Kan beisei angin thil a kaltluang a, final-ah ṭha lehzuala kan khelh ka beisei," a ti.

Run 78 siama khel ṭha tak batsman Jason Roy chuan, "Hei lo liama hlimna hi a awm chuang lo a, ka ṭhiante hmela hlimna leh lawmna hi ka career chhung zawnga ka hriat reng tawh tur thil a ni. Kan bowler pahih Chris Jordan leh Ben Stokes-te'n an khel ṭha takzet a, an inbuatsaih dan nena ngaihtuah phei chuan khelh ṭhat hi an phu a ni. Final-ah kan lut a, tupawh hmachhawn turin kan inpeih," tiin a inringtawk hle.

New Zealand captain Kane Williamson chuan, "Ṭha taka bul kan ṭan hnuah ropui takin England bowler-te an lo kir leh a, fak an phu a ni. Kan run siam hrim hrim kha a tam lo tih ka pawm a, mah se team ṭha zawkin hnehna an chang tih hi pawm ngai chu a ni. Keini aiin an vawm ṭha zawk a, batting lamah pawh an ti ṭha zawk. Jason Roy-a khel kha a hmuhnawm takzet bawk," tiin an khingpuite a fak.

Inkhel chhehvel

England-in tun tournament-ah six run vawi 34 an vaw tawh a, six run vuak lama anmahni hnaih bertu South Africa chuan vawi 28 chiah an la vaw chhuak.

Jason Roy-a'n run 78 a siam kha World Twenty20 semifinal-a run siam hnem ber dawttu a ni a, kum 2009-a run 96 siamtu Sri Lankan batsman Tillakaratne Dilshan chiah a phak lo.

World Twenty20 semi-fi-nal-a wicket thum la thei bowler pariat zingah Ben Stokes a tel ta a, English bowler zingah phei chuan amah chauh hi hetiang dinhmun luah thei a ni.

Hmabak

Nizan khan inelna thlengtu India leh West Indies-te'n semi-final hnuhnung zawk an khel a, an result kan hre hman lo. Wankhede Stadium, Mumbai-a team pahnih inkhela chak zawk zawk leh England-te hian Pathianni zan dar 7:00-ah Eden Gardens, Kolkata-ah final an khel ang.