Middlesbrough-in Chelsea an barakhaih

Nomawi beisei Chelsea-in Riverside Stadium-ah Middlesbrough an tlawh a, Mauricio Pochettino hote hi Carabao Cup semifinal-ah chak tura ngaih ni mah se chance ṭhahnem tak an hlah avangin 1-0 in an tlawm.

Blues vanneihna erawh League Cup semifinal hi vawi hnih khelh tur a ni a, Stamford Bridge-ah January 23, Thawhlehni zan hian second leg khelh tur a la nih avangin Wembley Stadium panna kawng a la inhawng zau hle.

Carrick-a naute

Chelsea hnehtu Boro hi Carrick-a enkawl an ni a, Manchester United legend hian Championship club tan hna ṭha tak a thawk. Kum 42 mi Carrick hian Man United tan a khelh lai khan Premier League nomawi panga a chawi a, FA Cup (1), League Cup (3), Europa League, Club World Cup bakah Champions League thlengin a champion vek.

Man United vanglaia midfielder rinrawl a nih avangin football a hrechiang tih a hriat theih a, Ole Gunnar Solskjaer hnuaiah team enkawltu zingah telin Norwegian manager an ban hnuah caretaker hna thawkin match thum a enkawl hman. Carrick hnuaiah Man United-in Villareal hnehin last 16 an luh phah a, Arsenal an hneh bakah Chelsea nen an inhnehtawk.

October 24, 2022 khan Carrick-a'n Boro a enkawl ṭan a, match 16-ah point 17 hmuin relegation zone aṭangin point khat chauhin an him. Carrick hnuaiah Boro hi match 23 aṭangin vawi 16 an chak a, palina ni pha hialin Premier League khel tur zawnna playoff semifinal-ah Coventry City an hneh lo.

Kuminah Boro an che ṭha tawk lo a, Championship-ah match 26 aṭanga point 36 hmuin 12-naah an awm mek. Mahse, Boro hian League Cup semifinal hial thlengin Chelsea lakah passing game an khel ngam. An khelh danah Carrick-a kut hnu hmuh tur a awm tlat.

Chelsea hmaah fiahna

Boro-in FA Cup-ah Aston Villa laka 1-0 chauha an tlawm hnuin Chelsea an mikhual a, inkhelh ṭan aṭangin mualneitu player-ten ball an in pass kual. Mahse, team ṭha zawk Chelsea-in uluk takin an ball inpe tur an veng ve tho. Jonny Howson pass chu Cole Palmer-a'n a dang hman a, pet tura a insiamrem hnuah goal pawnah chiah a pet.

Chelsea chungnung hret mah se an tlarhnung an fimkhur tawk lo, minute 37-naah goal an chhuah. Ball vawrh luh satliah um luttu Isaiah Jones-a'n defender Levi Colwill-a'n a veng chungin ṭha takin a cross a, Hayden Hackney-a'n a khung. Riverside Stadium-ah thawm a ṭha hle.

Goal chhuah hnuah Chelsea ben harhin an awm a, an goal bawh a na sawt. Moises Caicedo-a'n box pawn aṭangin goal pawnah chiah a pet. Hemi hnu hian Enzo Fernandez-a ball pet chu keeper Tom Glover-a'n tiper mah se goal ruakah Palmer-a'n a pet over!

Boro-in goal venhim hna tawp an thawk tawh a, chutichung chuan Blues hian an la ṭhiat thei tho. Caicedo ball pass ṭha chu Palmer bawkin changin, keeper Glover chauh a hmachhawn chungin a khung thei lo.

A goal chuang lo

Chelsea-in si phurh sut ngei tumin second half an ṭan a, Noni Madueke-a'n hnai tak aṭangin a tauh goal thei lo. Poch-a'n vanneihna beiseiin Madueke aiah Mykhailo Mudryk a luhtir a, Enzo aiah Armando Broja a rawn lut bawk.

Mahse, Chelsea-in goal khung an harsat tlat. Conor Gallagher-a'n a hun ṭha neih chu goal zawnah a pet lo. Mudryk-a'n hun ṭha insiam a harsat a, Raheem Sterling pawhin a hun ṭha neih goal zawnah a pet thei lo.

London club-in goal an khung thei lo a, 1-0 in an chak lo. Blues ṭantu ṭhenkhat an thinrim a, Thiago Silva leh player ṭhenkhatin an bengdai hial. Boro khel ṭha bawk mah se Chelsea tan Championship club hneh loh hi mualphona a tling.

Blues hi season hnuhnung pahnih inelna hrang hrangah vawi 31 an chak lo tawh a, Premier League club zingah anni aia chak lo tam chu Bournemouth leh Nottingham Forest (32 ve ve) te chauh an awm. Hemi hun chhung hian London club hi khualmualah vawi 21 an chak lo a, khualmuala chak lo tam ber an ni bawk.

Engtin zel?

Chelsea hian Boro an mikhual hma hian January 13, Inrinni zan dar 6:00-ah Fulham an mikhual dawn a, Premier League-ah 10-na aṭanga talchhuah an duh nih chuan chak ngei a ṭul dawn. Mauricio Pochettino chuan, "Team ṭha zawk kan ni a, goal kan khung thei lo," tiin inkhelh banah a sawi a, Cottagers lakah chuan chak a ṭul tawh dawn.

Blues result a ṭhat loh avangin supporter zingah Poch ban duhtu an awm tawh. Argentine manager Pochettino chuan, "First half-a kan tihsual kan tuar. Second half-ah inkhel thunun mah ila chance ṭha insiam kan harsat. Chutihrualin minute 90 kan khel a, minute 90 dang khelh tur a la awm. Beiseina sang tak kan la nei a ni," tiin final thlen ngei a beisei thu a sawi.