Mizoram team-in training an ṭan

Santosh Trophy final round khel turin Mizoram team chuan nimin zing aṭang khan RG Stadium, Mualpuiah training an ṭan. Mizoram team hi coach Lalsangzuala Hmar, manager Lalenghluna (Maenga) leh assistant manager Lalzarzova ten an ho a, nikum October thla khan final round khel turin Amritsar, Punjab-a khelh qualifying round-ah an inpettling.

Final round hi Arunachal Pradesh-ah khelh tur a ni a, FIFA president Gianni Infantino-a'n a hmunah a en dawn. Kumin inelna hi FIFA Santosh Trophy tih a ni a, kalphung pawh an thlak hret. Final round-ah hian team 12 chu group hnihah ṭhenhran a ni a, kum dangah chuan group khat aṭangin semifinal khel turin a sang pahnih an tling. Kuminah erawh a sang paliin knockout stage an khel dawn a, quarterfinal a awm tawh dawn.

Qualifying round leh final round inkarah January transfer a tlak zeh avangin AIFF chuan thuchhuah an siam a, squad an thlak an phal. February 5, 2024 hian player 40 thehluh tur a ni ang a; February 15, Thawhṭanniah player 22 awmna final squad thehluh leh tur a ni.

Santosh Trophy final round hi February 21, Nilaini aṭangin khelh ṭan a ni ang a; March 9, Inrinniah khelh zawh a ni ang.

Group inṭhen dan

GROUP A: Arunachal Pradesh, Meghalaya, Goa, Assam, Services, Kerala

GROUP B: Karnataka, Maharashtra, Delhi, Manipur, Mizoram, Railways