Zaborowski-a'n training a zawm nghal

I League club Aizawl FC chuan kumin atana training hmasa ber chu nimin zing khan RG Stadium-ah coach B. Malsawmzuala hoin an nei a, player thar Rafal Zaborowski-a'n training a zawm nghal.

Kum 29 mi Zaborowski hi Aizawl FC-in an biak felna a rei tawh a, amaherawhchu Polish midfielder hian India rama rawn lut turin visa a hmu lawk thei lo. Nikum December khan visa hi a tifel hman a, match khat chauh khelh tur a awm tawh avangin kumin aṭangin a rawn zawm ta zawk. Zaborowski hi Polish club, Norwegian club, Romanian club, Slovak club, Greek club bakah Bangladeshi club tan thlengin a khel tawh a ni.

Aizawl FC hi I League-ah palinaah an awm mek a, match 11 aṭangin point 19 an hmu. Mizo club hian tun season I League-ah beiseina sang tak a neih avangin January transfer-ah foreigner pathum an la dawn a, Zaborowski bakah hian player pahnih dang an lak belh ang.