Asian Cup leh India

Indian football ropui vanglai sawi dawn apianga, "Hmanah chuan..." tia bul ṭan a ngai hi a lungchhiatthlak lai chu a ni. Blue Tigers hian Asian football an lo thunun tawh ṭhin a, Asian Games 1951 & 1962-ah phei chuan gold medal an la hial.

Asian Games-ah vek hian kum 1970 khan bronze medal lain, kum 1958-ah khan palina an ni. Kum 1964-ah khan a vawi khat nan Asian Cup an khel a, Israel-a neih inelnaah hian pahnihna an ni.

Kum 1984-ah India-in Asia Cup khel leh mah se, group stage an paltlang lo a, Indian coach mai ni lo, India coach ni tawh zinga ropui ber ang hiala chhal Syed Abdul Rahim-a'n mual a liam hnuah phei chuan Indian football-in ngai a awh leh tawh lo.

India-in Asian Cup a khelh phak loh vang vang hnuah, kum 2011 khan English coach pachal Bob Houghton-a kaihhruaina hnuaiah India-in Asian Cup an inpetkai leh hlawl a, an tawpna erawh group stage tho a ni.

Hemi ṭum pawh hian India hi group C-ah awmin, team ṭha ṭhiau tia chhal theih Australia, South Korea leh Bahrain te nen an awm ho a, Asian Cup khelh phak pawh hlawhtlinna a nih avangin India tan knockout round luh beisei ngam chi a ni lo.

India hian an match hmasa berah Australia hmachhawnin, 4-0 ngawtin an tlawm a, Australia tana goal khungtute hi khatihlaia Everton attacking midfielder Tim Cahill (2 goals), Liverpool winger hlui leh khatihlaia Galatasaray forward Harry Kewell leh a hunlaia AZ Alkmaar tana khel Brett Holman te an ni a, hei hian India nena an inthlauhzia a pholang.

Blue Tigers hian match hnihnaah Bahrain chu 5-2 in an ngam lo a, India tana goal khungtute hi Gouramangi Singh leh Sunil Chhetri te an ni a, match tawp berah South Korea chu 4-1 in an ngam lo bawk.

He inkhela goal awmchhun hi penalty aṭanga Chhetri khung a ni a, goal a khung hian 2-1 ni chiah mah se, South Korea lamin goal hnih dang an khung leh zui.

South Korea tana goal hnih khungtu Ji Dong-won chu Asian Cup a khelh ṭhat avang hian khatihlaia Premier League club Sunderland chuan an la lut zui a, a hnuah German club FC Augsburg leh Mainz O5 tan te a khel bawk.

Goal khungtu pakhat Koo Ja-cheol chu khatihlaia VfL Wolfsburg midfielder a ni a, goal khat khungtu dang, tun hnua Asian player awm tawh zinga ṭha ber ang hiala tam takin an chhal Son Heung-min chu khatihlai khan Hamburger SV tan a khel.

Khatihlaia Indian player zingah khan Sunil Chhetri chu ram pawn club tana khel awmchhun a ni a, Major League Soccer club Sporting Kansas City tana a khelh lai a ni.

Hetihlaia India chhuanvawr Bhaichung Bhutia chu kum 34 mi a ni tawh a, hliam nei chungin Asian Cup-ah hian a kal. Match hmasa pahnih a inlan loh hnuah South Korea lakah bench aṭanga luhtir a ni a, awmzia erawh a nei lo.

Asian Cup 2015 an inpetkai zawh loh hnuah, kum 2019 khan India hi an inpetkai ve leh a, Mizo striker chhuanvawr Jeje Lalpekhlua chu squad-ah telin, Asian Cup-a Mizo hming a lan hmasak ber a ni.

India hian an match hmasa berah team ṭha zawka ngaih Thailand chu 4-1 ngawtin an sawp a, goal lina hi Jeje-a khung niin, South Tuipui bialtu MLA ni ta goal khung hi goal mawi bik a ni.

Mahse, India hian United Arab Emirates (2-0) leh Bahrain (1-0) ngam lo zuiin, group stage-ah Asian Cup an tawpsan a, kuminah Lallianzuala Chhangte leh a ṭhianten knockout round mitthla chungin Asian Cup khelh an tum dawn.