Siamtharna changtu Apuia?

India-in tun hnaia midfielder a neih ṭhat ber zinga mi Lalengmawia Ralte (Apuia) leh coach Igor Stimac te inhmuh thiam loh thu September khan a thang a, Apuia hi King's Cup leh Merdeka Cup-ah te hruai a ni lo zui. Mahse, November-a World Cup qualifier khelh a nih meuh chuan squad-ah hmun pawimawh a chang leh tawh.

Stimac-a tana en kan luih harsa khawpin Apuia hi ISL lamah a hmuhnawm a, squad puan chian a nih hma khan Croatian coach hian Apuia hi squad-a a tel tur thu a tichiang daih tawh - tun inelnaah pawh India tan player pawimawh a ni ang.

Vaivakawn tlangval chuan, "Kan inbuatsaihna a ṭha thawkhat. Kan group a harsa dawn. Mahse, kan theihtawp kan chhuah ang a, a bak chu Pathian kuta dah a ni tawh mai. Asian Cup hi chu a boruak a danglam tawh a, team tin leh inelna thlengtu thlengin an phur a, kan elpui tur player-te an ṭha bawk nen, a phurawm khawp mai," tiin Vanglaini a hrilh.