AFC Asian Cup - a hun a thleng hnai ta

Asia khawmualpuia ram leh ram inelna sang ber AFC Asian Cup 2023 chu Zirtawpni zan aṭangin khelh ṭan a ni dawn ta a, inelna thlengtu Qatar chuan zan dar 9:30-ah match hmasa ber khel turin Lebanon an hmachhawn ang.

Ram 24 inelna tur Asian Cup-ah hian India pawh an tel ve dawn a, Blue Tigers hian group B-ah Asian football-a ram langsar Australia, Uzbekistan leh Syria an awmpui dawn avangin knockout round luh a harsa dawn.

India squad-ah hian Mumbai City forward Lallianzuala Chhangte, midfielder Lalengmawia Ralte (Apuia) leh East Bengal defender Lalchungnunga te chu squad-ah an awm a, Asian Cup-a Mizo tam ber ṭum a ni.

A hmun

World Cup 2022 pawh hlawhtling taka thlengtu Qatar chuan inelna hi khawpui pangaah an thleng dawn a, Al Khor, Lusail, Al Rayyan, Doha leh Al Wakrah ten inelna hi an thleng dawn a, stadium pakuaah inelna hi khelh tur a ni.

Stadium zingah mi 88,966 lenna Lusail Stadium chu stadium lian ber a ni a, Doha khawpuia mi, mipui 10,000 lenna Abdullah bin Khalifa Stadium chu stadium te ber a ni thung.

World Cup 2022 final thlengtu Lusail Stadium bawkin Asian Cup final a thleng dawn a, Zirtawpni zana khelh tur opening match pawh Lusail-ah tho hian khelh tur a ni.

A kalphung

Asian Cup hi February 10-ah final khelh tur a ni a, Asian football-a khawmpui lian ber hi a ṭiak zui ang. Inelna hmachhawn tur ram 24 te chu group parukah, ram pali zel awmin ṭhen hran an ni.

Group awmna fuh deuh tan chuan round of 16 luh ngei ngeina chance a awm, tiin a sawi theih - group tina a sang pahnih chu last 16 lut chiang tur an ni a, pathumna zinga a tiṭha zual paliin an lut bawk ang.

India tan Australia an ṭha deuh a nih pawhin, Uzbekistan leh Syria lakah chuan 'fight' thei tura beisei an ni a, Blue Tigers tan Asian football-a an ropuina nei let turin kawng hawnin a awm mek.