Real Madrid-in Alphonso Davies an duh

An player duh zawng apiang la thei mai ṭhin Real Madrid chuan Alphonso Davies an duh. Spanish team lian hian tun thasik bazar chhung ni loin, nipui bazar lo thlen hunah Bayern Munich defender hi lak an tum dawn.

Kum 23 mi Davis hian German champion Bayern tan hian kum 2025 June thla thleng daih contract a nei mek. Canada international lak chhuah hi thil awlsam a ni dawn lo, sum an hman tam ngam pawh a ngai ang.

Tun hnai khan Real Madrid hian an coach Carlo Ancelotti chu contract thar an ziah pui. Brazil enkawl tur anga sawi ni hman Ancelotti hian left-back a mamawh, tun season kal laiah Ferland Mendy leh Fran Garcia te a chhawr chhawk ṭhin, dingnghet pangngai thei tur a duh niin an sawi.

Ancelotti enkawlna hnuaiah Real Madrid hian hlawhtlinna hrang hrang an lo chang tawh ṭhin, mahse season hmasa khan Copa del Rey chauh an chawi. La Liga season kal laia hmahruaitu an ni a, chutihrualin pahnihna Girona nen point 48 ve ve an hmu - inchhuang thei an ni rih bik lo.

Italian manager hian team ropui din leh a tum mek, nipui bazar hmasa khan England midfielder Jude Bellingham an lalut a, an ti fuh hle. Mahse, striker rinrawl Karim Benzema thlaktu erawh an la nei ṭha tawk lo thung.

Khawthlang chanchinbu mite sawi dan chuan Real Madrid hian Kylian Mbappe chu Paris Saint Germain tana contract a hman zawh ruala lak an tum a, France captain bakah hian Bayern Munich duhlai Davis hi an team tih chak nan an duh a ni.

Davis hi kum 200 khan Ghana raltlan awmkhawmna hmunah a puang a, kum 16 mi chauh a nih laiin Canada tan a khel phak der tawh. Bayern Munich tan pawh nomawi 13 a chawi tawh, heng zingah hian Bundeslia nomawi 13 leh Champions League pawh a tel.

Tun season Bundesliga match zawng zawng a la khel vek a, league match bakah Champions League match vawi ruk an khelh hoah bul a ṭan vek - Bavarians tan chuan an player pawimawh berte zinga mi a ni - Real Madrid lakah hian ṭang zo tak ang maw!