Second round-ah Srikanth a lut

India tlangval badminton khel thiam Kidambi Srikanth chuan, Malaysia Open Super 1000 badminton tournament khelh laiah a khingpui Jonatan Christie hnehin second round a inhlangkai.

Indonesian player Christie hi world number 5 ni lai a ni a, hmachhawn a awlsam lo - game hmasa ber pawh a la. Mahse, darkar khat leh minute nga an inkhelh zawh meuh chuan India tlangval zawk hi 12-21, 21-18, 21-16 in a chak.

Srikanth hi a vanglai chuan world number 1 ni thei a ni a, tun hnaiah tlahniam deuh mah se theihna sang tak a nei tih erawh rinhleh tur a awm lo. A match lehpekah chuan Hong Kong mi NG Ka Long Angus a tum leh ang.

Paris Olympic awm kum a ni a, player tan tournament zawng zawng a pawimawh vek - ranking sang zual 16 ten Olympic badminton inelna an hmachhawn ṭhin. Tun dinhmunah Srikanth hi world number 20 a ni mek, hmasawn a mamawh takzet a ni.

Hmeichhe doubles lamah Ashwini Ponnappa leh Tanisha Crasto te ṭangdun chuan USA nila Francesca Corbett leh Allison Lee te inkawp chu 21-13, 21-16 a hnehin last 16 an inhlangkai ve bawk.