Bologna henhin Fiorentina an tlang

Fiorentina chuan Italian Cup semifinal an lut - quarterfinal inkhelah Fiorentina hi Bologna nen goal lut loin an inhnehtawk a, penalty shootout hmanga chak zawk zawnah season hmasa pahnihna hi 5-4 in an vannei.

Thawhlehni zan inkhelah Bologna hi an vanduai tia sawi theih a ni, mikhual team hian woodwork vawi thum ngawt an tih per. Penalty pet hmasa paliten team pahnih tan an khung vek a, an inhnehtawk chho hle.

Bologna tana pet hnuhnung ber Stefan Posch chuan goal kham chungah a thlawh chhuak hlauh - Fiorentina tan Maxime Lopez chuan rawn khung zuiin a team a chakpui a, season hmasa ang bawkin an thleng sang leh ta a ni.

Fiorentina coach Vincenzo Italiano chuan, "Bologna nen kan inkhelh hma khan hahchawlhna tur chun darkar 24 pawh kan nei tling lo. Chuvangin ka naute an chau, goal chhuah loa kan khel tluan thei kha a lawmawm.

"Penalty hi chu ṭum vawr ang mai a ni a, vanduai leh vanneih inkar mai a ni. Tun ṭumah chuan ṭha taka match kan khelh zawh hnuah player pangaten an hna an tlin leh vek, kan result avang hian lawm tur kan ni," a ti.

Nizan khan quarter-final match pahnih khelh a ni a, zanin dar 1:30 hian Juventus leh Frosinone ten semifinal lut tur team hnuhnung ber an ti chiang bawk ang.