Tottenham-in loan hmangin Werner an lalut

Germany international forward Timo Werner chu Premier League-ah a kir a, London-ah bawk let mah se tun ṭumah erawh Chelsea ni tawh loin Tottenham Hotspur-ah an ni thung.

Spurs hian RB Leipiz aṭangin Werner hi tun season tawp thleng an hawh dawn a, lei ngheh theih dan. London club hian Werner hi an duh a nih chuan euro maktaduai 17 sengin a la belh thei dawn bawk.

Manager ropui Jose Mourinho-a'n Spurs hi nomawi a chawipui thei lo a, Harry Kane pawhin nomawi chawipui thei loin nomawi chawi duhin Bayern Munich a zawm. Werner erawhin, "Club lian ka zawm a, nomawi chawi turin Tottenham ka zawm," tiin beiseina a nei sang hle.

Kum 27 mi Werner hian Leipzig aṭang bawk hian June 18, 2020 khan khan pound maktaduai 47.5-in Chelsea a zawm tawh. London club tan hian season hnih khelin Premier League-a goal khung belh khawm chu goal 10 chauh a ni.

Mahse, Werner hian Chelsea hi Champions League, FIFA Club World Cup leh UEFA Super Cup-ah nomawi a chawipui vek a; FA Cup leh League cup-ah final a thlenpui bawk.

German forward hi Leipzig-ah a kir a, season khat leh a chanve chauh la khel mah se DFB-Pokal leh DFL-Supercup nomawi a chawi leh tawh. Chutihrualin Leipzig-ah Werner hian a pha chuang lo a, kerek hliam vangin FIFA World Cup-ah pawh a tel lo. Bundesliga-ah erawh a let leh season-ah hian match 27 a khel tho a, goal kua a khung. Tun season-ah match riat chauh la khelin goal hnih a khung a; Lois Openda, Yussuf Poulsen leh Benjamin Sesko te tluk loin bench-ah hun a hmang tam zawk.

Spurs manager Ange Postecoglou-a'n Werner hi a duh amah ngeiin German forward hi a bia. Werner chuan, "Manager nen kan inbia a, tlang takin club khelh dan hmang thlengin a sawi a, keipawhin ka inkawp reng ka ring. Player ṭha ber kan nih theih ka ring a, tlarhmaah chuan an mamawhna lai apiangah ka awm thei a ni," tiin a sawi.

Tottenham hian January 14, Pathianni hian Old Trafford-ah Manchester United hmachhawn turin an lenglut dawn a, hmabak a harsa nghal dawn hle.