Olympic qualifier khel tur Remsiami a inpeih

Paris Olympic 2024 a hnai chho zel a, infiamna peng hrang hranga inlan thei tur zawn mek a ni. India hmeichhe hockey team pawhin qualifying an khel dawn - Lalremsiami Hmar chuan inelna hmachhawn tura a inpeih tawh thu Vanglaini a hrilh.

Asian Games neih zawh takah India hi an champion zo lo, pakhatna ni se la chuan qualifying khelh ngai loin Olympic atan an tling ang. Pahnihna an nih avangin qualifying an khelh a ngaih phah ta a ni.

FIH Hockey Olympic qualifiers hi January 13-19 chhung hian Marang Gomke Jaipal Singh Stadium, Ranchi-ah khelh a ni dawn. India team chuan tun kartir lam khan inelna neihna tur hmun hi an thleng fel tawh.

India hi Group B-ah New Zealand, USA leh Italy te nen an awm. Group A lamah Germany, Japan, Chile leh Czech Republic te an awm thung. Group pahniha awmte hi an inkhel kual ang a, a sang pahnihten semifinal an lut ang - final lut team pahnihten Paris pan turin ticket an nei dawn a ni.

Mizo nula Remsiami chuan, "Thil tum sang tak kan nei a, chumi tihlawhtling tur chuan inbuatsaihna pawh kan nei ṭha hle. Tunah chuan Paris Olympic khelh ngei tumin theihtawp kan chhuah dawn.

"Tun hma lama ka sawi tawh angin ṭawngṭaina hian thil a ti thei em em a, tun ṭumah pawh hian Mizo mipuite min lo ṭawngṭai pui leh ṭheuh turin ka sawm a ni," tiin Vanglaini a hrilh.

Thenzawl Hockey Training Center aṭanga inzir chhuak Remsiami hi India tan player pawimawh berte zinga mi a ni mek, nikum khan hliam vangin thla khat chuang a inkhel thei lo, tunah erawh ṭha takin training a zawm pangngai leh thei tawh a ni.