Bayern Munich defender thar Dier

Eric Dier chuan Bayern Munich a zawm dawn a, nimin khan Munich airport thlengin medical a nei nghal ang. English defender Dier chuan Bayern hi club ropui tak a nih thu a sawi.

Bayern manager Thomas Tuchel chuan, "Centre back-a khel turin kan lalut a, specialist centre back niin ding leh vei lamah a awm thei ve ve. Defence laiah pathum kan chhawr a nih pawhin a hman tlak. Premier League-ah chuan no. 6-ah pawh a khel tawh ṭhin," tiin a sawi a, he thuziah lai hian Dier-a'n medical test la patlang chiah lo mah se a engkim a chiang tawhah a ngaih theih.

Kum 29 mi Dier hian Tottenham Hotspur aṭangin Bayern Munich hi a zawm a, club leh ram tana khelhpui ṭhin Harry Kane nen an khel dun leh dawn. Bavarians hian Dier manah hian euro maktaduai li vel an seng ang.

Tun season-ah Dier hian Spurs-ah khelhna hmun a chang tam meuh lo a, match li chauh a inlan. English club tana a contract neihlai hi June 2024 thleng chauh a nih avangin a man hi a to thei lo bawk.

Bayern Munich hian tlarhnungah Dayot Upamecano, Matthijs de Ligt bakah Kim Min-jae te an awm a, an dam kim ṭhap chuan Dier tan khelhna hmun chan a har ang. Chutihrualin Asian Cup vanga Kim Min-jae a awm dawn loh avangin Bayern tan Dier an lalut thei hi chanchinṭha a ni.

Dier hian England tan match 49 a khel tawh a, Spurs-ah nomawi chawi lo mah se Champions League leh League Cup final an thlen ṭumin player pawimawh a ni pha. Premier League leh Champions League thlenga tawnhriat nei ṭha a nih avangin Bayern tan pawm a hlu khawp ang.

Bundesliga-ah thlasik chawlh an neih hnuin zanin aṭangin inelna an ṭan dawn a, Bavarians hian zanin dar 1:00 hian Hoffenheim an mikhual dawn. Tuchel-a hote hian match 15-ah point 38 an hmu a, hmahruaitu Bayer Leverkusen point liin an pha lo.