Tatum hoin Celtics an chak

Boston Celtics chuan NBA champion an tum ngam tih a takin an lantir leh ta. Nimin zing inkhel hmuhnawmah Boston hian Minnesota Timberwolves chu overtime an khelh pui a, a tawpah 127-120 in an chak.

Jayson Tatum-a'n Celtics tana innghahna tlak a nihzia lantir lehin, point 45 a nei - a point neih zinga 12 chu overtime chhunga a neih niin, hun pawimawh laiah a che fuh hle tihna a ni. Point 35 a neih bakah rebound vawi 11 latu Jaylen Brown a langsar leh bawk a ni.

TD Garden bikah Boston hian an match khelh hnuhnung 18-ah hnehna an chang vek, tun regular season kal laiah vawi 29 an chak tlinna niin Eastern Conference hmahruaitu an ni a, chak lo mah se Minnesota pawh Western Conference table chung berah an la awm.

Nimin zing inkhel dangah San Antonio Spurs chuan 130-108 in Detroit Pistons an hneh. An chak theih nan Victor Wembanyama chuan minute 21 chhung lekin triple-double (16 points, 12 rebounds leh 10 assists) a nei a, NBA huangah triple-double nei tura hun mamawh tlem pahnihna a ni hial.

Atlanta Hawks chuan Philadelphia 76ers lakah 139-132 in hnehna an chang a, team dang - Indiana Pacers, Sacramento Kings, Oklahoma City Thunder, Chicago Bulls leh New Orleans Pelicans te pawhin an khingpui ṭheuh an hneh.