Madrid derby-ah goal riat a lut!

Spanish Super Cup semifinal-ah Real Madrid leh Atletico Madrid an intawng a, goal riat ngawt a lut - Nilaini zana Madrid khaw club lian pahnih inkhelah hian 5-3 in Real an chak.

Team pahnih hi hun pangngaiah 3-3 in an inhnehtawk a, extra time khelh a ni. Minute 30 dang inkhelah Real-in goal hnih an khung belh laiin, Atletico lamin a chhanletna tur an nei tawh lo a, Real-in final an lut.

Atletico tan Mario Hermoso chuan hma takah goal hmahruai a khung a, Real-in Antonio Rudiger leh Ferland Mendy hmanga chhangletin, 2-1 a ni. Mahse, Atletico hian Antoine Griezmann leh Rudiger hmangin an khung ve leh a, 3-2 a ni.

Carlo Ancelotti naute an tlawm mai dawna a lan tawh hnuah Dani Carvajal chuan si phurh sut lehin, extra time khelh a ngai zui. Real tan Joselu leh Brahim Diaz ten goal khat ve ve khungin, 5-3 in Real an chak daih.

A hmuhnawm

KSU Stadium, Riyadh-ah mipui leng zat 25,000 a khat vekin an kal khawm a, an beisei ang ngeiin inkhel hmuhnawm chhawpsak an ni - minute rukna lekah Atletico-in goal an khung hmasa a, Griezmann-a siamsak chu Hermoso chuan goal-ah a chantir.

Mahse, Real an hnufual rei lo. Rüdiger chuan Luka Modric-a corner pet chu si phurh sut nan a khung ve leh a, minute 29-naah Mendy chuan Carvajal-a siamsak chu hmahruaina goal ni turin mawi zetin a khung zui.

Goal khung hmasa zawk Atletico-in si phur chunga chawlhlawk hman an duh lo. An thiampuipa Griezmann chuan mawi zeta Real defender pahnih a bum hnuah si phurh sutna goal a khung ve leh a, 2-2 a ni.

Kum 32 mi Griezmann tan tun season-a goal 17 a khungna a ni der a, Atletico tana goal khung hnem ber a ni bawk - club legend Luis Aragones-a record a khum a, Atletico tan hian match 368-ah goal 174 khungin, assist vawi 80 a nei.

An inngam

Saudi Arabia-a inkhelah team pahnihin a tlawm zawk nih an duh lo a, season laklawh laia inkhelah hla taka a thlawna zin an duh lo - minute 78-naah Atletico chu goal khungtu zawkah an ṭang leh a, 3-2 in hma an hruai.

Real striker hlui Alvaro Morata leh Real keeper Kepa Arrizabalaga-te ball inchuh kara lo inrawlh Rudiger chuan an lamah a tilut a, Real goal chhuah hmasak ber suttu kha an lama tiluttuah a ṭang leh ta thung.

Sana enin hun tawp a hnai tawh a, Real fan-te an hlauthawng. Mahse, Real-in tawp an lo la tum lo. Hun tawp nan minute nga chiah a awm tawh tiha Jude Bellingham shot chu goal line-ah dan ni mah se, a per lehlam chu Carvajal chuan goal-ah a chantir.

Real ṭantute an sapatal a, Atletico an hawihai. Hun tawp thlengin goal dang a awm tawh lo a, minute 30 dang khelh belhin, a chak tur zawk zawn a ṭul.

A tawpah Real

Extra time khelh hnuah pawh hian goal a lut lo reng a, team pahnih hian penalty hmangin final lut tur zawk an chinfel mai a ṭul dawn niin a lang tawh. Mahse, Real-in ngaihdan dang an nei.

Na takin Atletico Madrid an nawr chhunzawm reng a, minute 116-naah an beisei goal an hlawh chhuak ta nge nge. Carvajal-a ball cross chu Real striker Joselu-a'n a lo tauh thawi hnuin, Stefan Savic chuan a lo khawih fuh ve leh a, Jan Oblak tana dan rual lohin a lut.

Atletico an hlauthawng a, chak ngei an duh. Na takin Real an nawr let a, hun pek belhah Atletico keeper Jan Oblak chuan si ban bula din reng ai chuan, goal nawr tura tlanchhuah ve chu thutlukna fingah a ngai a, a tisual.

Real-in ṭha takin ball an pet chhuak a, Oblak tlanpelin Brahim Diaz-a'n ṭha zetin goal ruakah a khung a, Real an chak a, final an lut. Nizan khan semifinal inkhel dangah Real leh Barcelona inkhelin, result kan hre hman lo - January 14 zanah he inkhela chak zawk hian Real nen final an khel ang.