Djokovic tana hnawk thei Alcaraz

Grand Slam nomawi nei tam ber a ni a, world number 1 ni rei thei ber a ni bawk - Novak Djokovic sulhnu hi engti kawng zawng maha sawi nep theih a ni lo, tun hnaiah amah chhaih buai phak a rawn chawr chhuak, a hming chu Carlos Alcaraz a ni.

Tun kartawp aṭangin Australian Open an khel dawn a, world number 1 Djokovic leh amah hnaih bertu Alcaraz te hi en bik hlawh an ni leh dawn, nomawi mai bakah ranking an inchuh dawn. Tournament a zawh meuh chuan ranking hmahruaitu pawh a inthlak thut thei ang.

Season hmasa khan Alcaraz hi a tir lamah hliam vangin a buai, inelna lian hmasa Australian Open pawh a khel lo. Djokovic erawh inlanin a vawi 10 nan a champion a, a hnu lamah season duhawm a hmang zui bawk.

Tun dinhmunah Djokovic hian world ranking lamah point 2200 in hma a hruai fal mek, mahse season hmasa nomawi a chawi tawhna Asutralian Open-ah hian a ranking point neih sa humhim a ngai a, a hmuh belh dawn lo tihna a ni.

Serbian star tan world number 1 ni zui turin champion nomawi leh ranking point humhim a ngai. A champion lo a, a elpui Alcaraz hi a champion a nih si chuan, season hmasa lama a inlan loh avangin ranking point 2000 a hmuh belh thei dawn, an ranking a inthlak daih thei dawn.

Spanish tlangval Alcaraz chuan, "A nihna takah chuan ka naupan laiin Djokovic inkhel ka en nasa, ani nena kan inhmachhawn mai piah lamah kan inel ve mai hi a mak ka ti zawk. Tournament lian kan khelh dunte hi ka tan a hluin ka hriatreng tawh tur a ni.

"Tun dinhmunah hian inkhel laia a ṭha ber kan sawi a nih chuan Novak a ni ang, kawng engkimah a puitlingin a ṭha vek. Chutihrualin ani hi hneh theih loh a ni bik lo a, player dangte pawhin amah entawn chungin a laka chak kan zir," a ti.

Nikum khan Djokovic-a'n Australian Open, French Open leh US Open nomawi a chawi vek. Grand Slam pali zingah Wimbledon chauh a la lo, grass court inelna lianah hian Alcaraz nen set nga an khelh hnuah a chak lo, kuminah pawh inkhel hmuhnawm min chhawpchhuahsak leh ngei a rinawm.

Tennis season khat chhungin Grand Slam pali an khel ṭhin, a hmasa ber atan Janaury 14, Pathinni aṭangin Melbourne Park-ah Australian Open an khel ṭan ang. Nilaini tlai khan seeded ni phak tur mipa leh hmeichhe player 32 ve ve tar chhuah a ni tawh.