Dortmund-ah Sancho a kir

Manchester United leh Borussia Dortmund te chu Jadon Sancho chungchangah an indawr a, English winger Sancho hi loan hmangin Signal Iduna Park-ah a kir. Kum 23 mi Sancho hi Erik Ten Hag nen an inhmuh thiam loh avangin tun season-ah Premier League match thum chauh a la khel a, first team zingah pawh a training tawh lo.

Nimin khan Sancho hian medical test a nei a, nizan thim hlimah khan Dortmund hian loan hmangin an la fel ta a ni. German club hian an player hlui la let tur hian euro maktaduai li vel lek an seng a, kum 2021 khan Man United lakah hian euro maktaduai 90 bawr velin an hralh.

Sancho hi discipline ṭhat loh avangin an sawisel nasa a, video games khelh atchilh nia sawi a awm bawk. Dutch manager Ten Hag-a hnuaiah Sancho tan inkhelhna hmun a awm lo a, a club hlui Dortmund-in amah sawiseltute chhanletna hun ṭha an hawnsakah a ngaih theih.

Dortmund hian Bundesliga-ah match 16 aṭangin point 27 hmuin panganaah an awm mek a, point 15 zetin hmahruaitu Bayer Leverkusen an pha lo, hna thawh tur an ngah.