Brazil coach thar Dorival

Brazil Football Confederation (CBF) chuan an coach thar atan Dorival Junior an lakluh thu an puang chiang ta a, coach lailawk aṭanga an chawlhtir Fernando Diniz hmun ruak a luah dawn a ni.

Kum 61 mi Dorival hian tun kartir lam khan Sao Paulo coach a nihna a lo bansan tawh a, world champion vawi nga ni tawh Brazil FA lamin coach atana an pawm thu hi an rawn nemnghet ve leh ta chiah.

Dorival hian tawnhriat a nei ṭha, tun hmain Sao Paulo bakah Atletico Mineiro, Atletico Paranaense, Internacional, Vasco da Gama, Fluminense, Palmeiras, Flamengo leh Copa do Brasil te a lo enkawl tawh bawk.

A hna erawh a awlsam dawn lo - South American World Cup qualifying khelh mekah Brazil hian match ruk an khel tawh a, vawi thum ngawt an tlawm - ram 10 inel zingah parukna an nih avangin an dinhmun a ṭha tawk lo hle.

World Cup chauh a ni dawn lo, tun nipui chhung hian Copa America khelh a ni dawn. Tun hnaiah an elpui Argentina chuan Copa America leh World Cup an la zawn, ram ṭha zawka inngai Brazil tan hei hi enliam mai mai theih tur chi a ni lo, el phak an tum dawn a ni.