Asian Cup khelh a ni dawn ta

Asia khawmualpuia ram leh ram inelna sang ber, Asian Cup 2023 chu zanin dar 9:30 hian match hmasa ber khelh a ni dawn ta a, inelna thlengtu Qatar leh Lebanon an inhmachhawn dawn.

Qatar hi inelna thlengtu an nih bakah champion lai an ni bawk a, Lebanon lakah chuan chungnung zawk tura ngaih an ni - an inkhelhna tur hi Lusail Stadium a ni a, mipui 88,966 lenna a ni.

World Cup 2022 final khelhna stadium-ah hian stadiuam luah khat khawp fans an kalkhawm a rinawm a, fans puihna nen, team ṭha zawk nihna nen Qatar-in hnehna hlado chham an tum ang.

A hming Ali

Asian champion tan tlarhmaah Almoez Ali chu innghahna tur a ni leh dawn a, kum 27 mi forward hian Qatar tan match 96 a khelhah goal 50 ngawt a khung tawh a, kum 2019-a an champion kum khan top scorer a nih bakah, best player atan thlan a ni.

Kum 2021-a CONCACAF Gold Cup khel tura Qatar sawm an nih pawh khan Almoez Ali hian semifinal hial a team hruai thlengin, goal li a khung a, top scorer a nih bakah USA, Mexico leh Canada te ho telna inelnaah hian team of the tournament-ah a lang bawk.

Club lamah chuan an ram club Al-Duhail SC tan khel mekin, Paris St-Germain boss hlui Christophe Galtier enkawlna hnuaiah a khel a, Philippe Coutinho te nen khel hoin, thil tam tak a zir belh ang tih a chiang.

Player dang

Qatar hian Almoez Ali chauh lo pawh player ṭha an kawl nual a, ram pawn club tana khel an neih loh hi tehfunga hman chi a ni lo - Qatar-ah sum a tam miau avangin an player-te tan ram pawn club pan hi thil châkawm a ni lo.

Kum 33 mi keeper Saad Al-Sheeb hi ram tana vawi 84 inlan tawh a ni a, kum 2019 an champion khan Golden Glove a dawng. Captain Hassan Al-Haydos hian Al-Sadd tih loh club dang tan a la khel ngai lo a, ram tan match 174 ngawt khel tawhin, goal 38 a khungsak.

Belgian club Eupen, Spanish club Villarreal leh Sporting Gijon tana khel tawh Akram Afif hi kum 27 mi chauh niin, ram tan match 96-a goal 26 khung tawh a ni a, Lebanon tlarhnung tan ven bik tur zingah a tel.

Lebanon hi

Dynamo Moscow boss hlui Miodrag Radulovic enkawlna hnuaia khel Lebanon hi zuam sual theih chi an ni - tun hnaiah Lebanese thisen kai, an ram tana inlan thei an vai khawm a, hei hian an squad a tichhah lehzual tih hriat a ṭha.

Mexico-a piang, Lebanese thisen kai, September 2022 aṭanga Lebanon passport nei Daniel Lajud Martínez hi Mexican club ṭha Monterrey aṭanga inzir chhuak niin, Mexican second division club Atlante tana khel a ni a, kum 24 mi attacking midfielder hi Qatar player hmaa zam tur a ni lo.

Canada mi, Lebanese thisen kai Gabriel Bitar hi Canadian Premier League club Vancouver FC tana khel a ni a, Germany-a piang Omar Bugiel hi League Two club AFC Wimbledon tana khel mek a ni bawk.

Player dang

USA-a piang, kum 31 mi forward Soony Saad hi US Under-17 & U20 tan pawha lo inlan tawh niin, MLS club Sporting Kansas City aṭanga a professional zinkawng zawh ṭan a ni a, MLS nomawi hial a lo chawipui tawh - Malaysia Super League club Penang tan a khel mek.

Indonesia club Sleman tana khel Jihad Ayoub hi Venezuela-a piang leh sei lian a ni a, kum 34 mi attacking midfielder Mohamad Haidar hi Lebanese Premier League Best Player-a vawi hnih ngawt thlan tawh niin, ram tan match 89 ngawt a khel tawh.

Captain Hassan Maatouk hi kum 36 mi ni tawh mah se, a la rintlak reng a, ram tana match 116 zet khel tawh a nih avangin a tawnhriat ringawt pawh hi ram tan a ṭangkai ang.