LPS Cup laiin inelna a tam dawn

Aizawl DFA leh LPS ṭangkawpin an buatsaih LPS Inter Village Football Tournament chu February 20, 2024 aṭanga khelh ṭan tur a ni a, veng/khua inelna hun lai hian football inelna a tam dawn avangin a nih tur ang a nih phak lo hlauhawm hle.

I League leh Indian Super League khelh lai a nih avangin Mizo player ṭha tam zawk chu an khel dawn lo chiang a. India rama state leh state football inelna sang ber Santosh Trophy chu February 21 - March 9, 2024 inkarah khelh a ni dawn a, tualchhung player ṭha 22 chu chhawr theih an ni dawn lo. State pawn league-a khel player engemaw zat an awm bawk a; I League 2 leh I League 3-a khel player-te an inlan thei dawn lo bawk.

AIFF-in All lndia Police Sports Control Board hnenah lehkha thawnin BN Mullick Memorial Trophy 2O24 inkhelh hun sawn a dil a, an sawn hla dawrh a nih ngawt loh chuan All India Police Meet-ah player ṭha engemaw zat an kal dawn.

LPS Cup ṭantirh lamah MFA Inter District Junior Boys Football Championship 2023-24 an la khelh dawn avangin naupang player chhuak thar ṭha tel thei lo tur an awm dawn.

Kum 21 lam inlena Reliance Foundation Development League chu January thla tawp lam hian khelh tur a ni a, team paruk chauh an tel dawn avangin LPS Cup a tih buai phak a rinawm loh. Chutihrualin veng/khaw ṭhenkhat training erawh a tibuai pha thung ang.

March thla hian MZU Sports awm tura ngaih a ni bawk a, LPS Cup khelh lai February-March thlaa inelna neih tur a tam hle. Veng/khua inelna hi chuan ngaihven ah hlawh ṭhin a, chutihrualin inelna neih hun hi sawn hret ni se a hlu zawk ang em tih chu zawhna awm theihna thei tak a ni.