Coppa Italia aṭangin AC Milan leh Roma an tla
Coppa Italia quarterfinal boruak a sang a, inkhel boruak sang leh hmuhnawm takah AC Milan leh AS Roma te chu a vanduai zawk niin semifinal an lut phak lo.
Milan chu an mikhual Atalanta lakah 2-1 in an chak lo a, he inkhelah hian Milan player Antonio Mirante chu hun tawp hma deuha hnawhchhuah a ni a, result danglam chhan erawh a ni lo tiin a sawi theih.
Nilaini zan inkhel dangah Lazio chuan an mikhual Roma chu si khat fai 1-0 in an hneh, hun tawp dawn lamah buaina chhuakin Lazio player pakhat leh Roma player pahnih hnawhchhuah an ngai hial.
Lazio goal neih chhun hi Mattia Zaccagni-a'n minute 51-naa penalty aṭanga a khung niin, minute 76-naah Roma player chu tui um (bottle) hmanga vawm a ni a, vawm a nih vang hian Stephan El Shaarawy chuan a rawn thlak a ngai hial.
Hun pek belhah Lazio forward Pedro chu hnawhchhuah niin, ani bakah hian Sardar Azmoun pawhin red card a hmu. Hamrik hnuhnung ber a rik hnuah Gianluca Mancini chu red card pek a ni ve leh cheu bawk.
Lazio hian semifinal-ah chuan Juventus leh Frosinone te inkhela chak zawk an hmachhawn ang, nizan khan quarterfinal match hnuhnung ber hi khelh a ni a, result erawh kan hre hman ta lo.
Roma erawh an che fuh hleithei lo. Jose Mourinho-a'n kum 2021 aṭangin Roma a enkawl ṭan a, derby match vawi ruk a hmachhawn tawhah ṭum li ngawt a tlawm ta, tun hma lama a sulhnu ropui neih ṭhin nena chhut chuan a inhmeh lo.
Mourinho chuan, "Inkhela chak lo zawk nih hi chu engtik lai mahin a nuam ngai lo, a bik takin derby match-a chak loh chu a hrehawm lehzual. Tunlai football hi chu hriatthiamna sang tak neih a ngai niin ka hria.
"A tirah referee khan penalty a pe lo, mahse VAR hman a nih hnuah penalty kan chawi leh ta si," a ti. Dean Huijsen-a'n Valentin Castellanos a tihtluk chu VAR hmanga ennawn a nih hnuah penalty an pe leh hnuhnawh a ni.
Coppa Italia quarterfinal inkhel dangah AC Milan chuan Rafael Leao hmangin chawlhlawk hma hretin goal hmahruai an khung a, mahse mikhual Atalanta lamin Teun Koopmeiners hmanga an sut bakah, ani vek hian chakna goal a khung bawk.
Atalanta coach Gian Piero Gasperini chuan, "Hun rei tak chhung chu Atalanta hian nomawi a chawi tawh lo, nikum lamah te hun ṭha nei mah ila kan chhawr ṭangkai thei lo thung.
"Kuminah remchang ṭha kan nei leh dawn niin a lang a, chumi tihhlawhtling tum chuan kan bei dawn. Kawng zawh tur a thui tawh lo a, a hautak dawn hle thung tih erawh kan hriat a ngai," a ti.
Atalanta hian kum 1963 hnu lamah nomawi an la chawi leh lo, tun hnaiah attacking football hmuhnawm chhawp chhuakin an khel ṭha ṭhin a, nomawi erawh an la chawi mai thei lo. Coppa Italia match an khelh hmabak pahnihah an chak a nih chuan an record duhawm lo tak hi an thaibo ang.