Prannoy chak loh laiin Satwik-Chirag tlang

Malaysia Open Super 1000 badminton tournament khelh laiah, mipa singles player HS Prannoy chu a match hmasa berah a chak lo. Prannoy a chak loh lai hian men’s doubles pair Satwiksairaj Rankireddy leh Chirag Shetty te erawh an chak thung.

Olympic awm kum a ni a, player tinin tournament khelh ṭhat an duh vek. Mahse, Prannoy erawh a che fuh rih lo, a khingpui Anders Antonsen nen minute 43 an inkhelh chhungin 14-21, 11-21 in a chak lo.

Season hmasa khan HS Prannoy-a'n a vawi khat nan World Championship-ah bronze medal a la a, Asian Games leh Malaysia Masters super 500 lamah sulhnu a nei ṭha bawk, tunah hian world number 8 niin Olympic khel turin a dinhmun a la ṭha pangngai rih hle.

Mipa doubles lamah world number 2 Satwik leh Chirag ten fiahna hautak an paltlang. An khingpui Indonesian pair Muhammad Shohibul Fikri leh Maulana Bagas te khel ṭha viau mah se India tlangvalte hi 21-18, 21-19 in an chak.

Nipui laiin Paris Olympic khelh a ni dawn a, infiamna khawmpui lianah hian badminton huangah chuan world ranking sang zual 16 te an inel dawn a ni.