Asian Cup 2023: India hmaa ding tur Australia

AFC Asian Cup 2023-ah vawiin tlai dar 5:00 hian India an inlan dawn a, an hmachhawn tur chu Australia an ni - Blue Tigers leh Australia inkar a zau a, mahse, hei tak hi a tien châkawmtu a ni lawi si.

A chhan maw? Blue Tigers hian Australia an hlauh bik loh thu an sawi a, AIFF Player of the Year ni lai Lallianzuala Chhangte chuan, "11 vs 11 inkhel tur alawm kan nih," a ti mai a, captain Sunil Chhetri chuan, "Mi mak tih result thlentir kan duh," a ti bawk.

FIFA ranking-ah India hi 102-na an ni mek a, Australia erawh 25-na an ni thung. Team pahnih hi khaikhin rual an ni lo a, mahse, India tan 'dawih aw' chhuah nghal a rem lo - an hmaah Uzbekistan leh Syria an la awm!

India tan point thum hmuh ai chuan Australia chelh hram tum chu thil finthlak zawk a niin a rinawm a, group tin aṭangin a sang pahnih bakah pathumna tiṭha zual paliin last 16 an luh dawn avangin India tan chance a awm - bawhpelh loh an tum ang.

Australia sulhnu

Kum 2006 khan AFC hnuaiah Australia an inziak lut ve ṭan chiah a, member an nih hnua Asian Cup khelhah chuan an inpettling vek - vawi li an khel tawh a, quarterfinal aia hniamah an tawp ngai lo!

Kum 2011 khan final lutin, pahnihna an ni a, kum 2015-ah an champion. Kum 2019 khan quarterfinal-ah an zinkawng a tawp a, kum 2006 aṭanga World Cup apianga la inlan vek team hian kuminah champion an tum ang.

Coach Graham Arnold hi tun hmaa an coach neih ṭhinte nena ngaihtuah chuan a langsar lo. Mahse, Australian coach niin, an ram team a hrechiang a, A-League Coach of the Year-ah vawi thum thlan a ni tawh bawk.

Australia assistant coach niin, coach lailawk dinhmun pawh a lo chelh tawh ṭhin a, Australia U23 a enkawl tawh bawk - hei tak hi Socceroos (Australia sawina) tan a ṭhat zawkna a ni. July 2018 aṭang khan enkawl tawhin match 46-ah vawi 30 a chakpui thei a, vawi 11 chiah a la tlawmpui a ni.

En bik tur

Mark Viduka, Tim Cahill leh Harry Kewell te vanglai ang khan Australia-in player langsar tia sawi vul chuk tur an kawl hran tawh lo a, mahse, A League-in hma a sawn ve zel bawk avangin Socceroos hi sawi chhiat tak tak theih an ni lo.

Captain leh goalkeeper Mathew Ryan hi Europe-a tawnhriat nei ṭha niin, Dutch club AZ Alkmaar tan a khel mek a, Valencia, Brighton & Hove Albion, Arsenal leh Real Sociedad tana lo khel tawh a nih avangin a tawnhriat ringawt pawh hi chhawr tham a ni.

Scottish Premiership club Hibernian forward Martin Boyle leh J League club Machida Zelvia striker Mitchell Duke te hi tlarhmaah innghahna tur an niin a rinawm a, Middlesbrough attacking midfielder Samuel Silvera leh Celtic winger Marco Tilio pawh sawi hmaih an thiang lo.

German second division club FC St. Pauli tana khel midfielder Jackson Irvine, Standard Liege defensive midfielder Aiden O'Neill leh Boro attacking midfielder Riley McGree te ho pawh Blue Tigers tan an tawh a khirh ang.

Engtin nge India?

India coach Igor Stimac-a tan game plan fimkhur a ngai dawn tih sawi nawn a ngai lo a, Croatian coach hian 4-2-3-1 hmangin player a rawn remkhawm tura ngaih a ni.

Si ban nghak tur chuan Gurpreet Singh Sandhu aia rin a neiin a rinawm lo a, tlarhnung laiah Sandesh Jhingan chu bul ṭan chiang niin, hliam vanga hruai loh Anwar Ali hmun ruakah Rahul Bheke dingin Jhingan a kawppui thei ang.

Defender ṭhangduang Akash Mishra chu left back-ah awmin, Nikhil Poojary chu ding lamah a awm ang. Australian midfield chhu chat turin engtiklai pawha rintlak Lalengmawia Ralte leh Suresh Singh Wangjam an inkawp a rinawm.

Mual vei lam sir aṭanga goal nawr turin player tlan chak bik Lallianzuala Chhangte chhawr a ni ang a, ding lamah Naorem Mahesh Singh awmin, a laiah tlarhmaa mal tlat Sunil Chhetri thlawp turin Sahal Abdul Samad a awm thei ang.

Beiseina neitu

ISL Best Player ni lai Lallianzuala Chhangte chuan, "An pumrua a ṭha a, an player-te hi European football-a tawnhriat nei deuh vek an ni bawk. Mahse, hneh theih loh an ni bik lo. A pawimawh berah chuan team kan inpumkhat a, kan theihna zawng zawng kan pek a ngai dawn.

"Mahni pressure insiam loh a, training-naa kan zir anga khelhchhuah kan tum a ngai dawn. An goal nawr tur dan chah dan tur leh nawr let dan tur kan zirte kan tithei a nih phawt chuan result duhawm tak kan nei thei ang," tiin Vanglaini a hrilh a, beiseina an neih thu a sawi.

Mumbai City forward chuan sawi zawmin, "Theihtawp chhuahin min lo ṭawngṭaipui dawn nia," a ti a, Mizo mipui ṭawngṭaipuina a beisei - India squad-ah hian Lianzuala bakah midfielder Apuia leh defender Lalchungnunga chu Mizo awm an ni.

Apuia chuan, "A harsa dawn, mahse, a sang ber thleng turin theihtawp kan chhuah dawn," a ti a, Pathian thu ni mah se mihring taka an theihna sang ber an hlan ve phawt tur thu a sawi.