Australian Open khel tur Sumit Nagal

India tlangval Sumit Nagal chu Australian Open 2024 khel turin a tling. Nimin chhun khan qualifier match hnuhnung berah Nagal hian a khingpui Alex Molcan chu darkar khat leh minute 47 chhungin 6-4, 6-4 a hnehin tournament tak tak khel turin a inhlangkai ta chiah a ni.

Court 3-a inkhelah Nagal hian bul a ṭan fuh a, a service vawi hnih chu hloh ve bawk mah se Slovakian player lakah break point vawi 10 a hmuh zinga pali chhawr ṭangkaiin, hun pawimawh laia point hmu zawk a nih miau avangin a tlang.

Kum 26 mi Nagal-a hi Haryana a piang leh seilian a ni a, a hnuah erawh Delhi lamah an khawsa zui. Zirtirtu fapa niin, kum riat mi chauh a nih lai aṭangin tennis hi a khel ṭan, a tan Australian Open hi thil thar a ni dawn bik lo.

Tennis inelna lian Grand Slam-ah hian main draw a khelh vawi lina tur a ni dawn. US Open bikah kum 2019 leh 2020 khan a inlan phak a, tun ṭuma an khelh tur Australian Open-ah pawh hian kum 2021 khan main draw a lo khel phak tawh.

Tun dinhmuna world number 139 Nagal hi Australian Open qualifier-ah hian seeded 28-na pek a ni a, a match hmasa berah Geoffrey Blancaneaux hnehin tualchhung tlangval Edward Winter a hneh zui leh a, a tawpah seeded 14-na Alex Molcan ngamin a tum ram a thleng.

Australian Open main draw khelh phak hrim hrim pawh hi a hlu, match hmasa ber an khelh hian chak lo pawh ni se la Rs 99,59,022 a hlawh phak dawn tho a, singles champion chuan Rs 26,13,98,655 an hlawh dawn a ni.