Spanish Super Cup Barcelona an chak - final-ah Real nen intawng dawn

Khawvelin Pathianni zanah a en châk inkhel hmuhnawm en tur a nei dawn a, El Clasico khelh a ni dawn. Barcelona chuan Ningani zan khan Supercopa de España semifinal-ah 2-0 in Osasuna an hneh a, final an inpetkai.

Barcelona hma hian Real Madrid chuan semifinal hmuhnawmah 5-3 in Atletico Madrid an lo hneh tawh a, final an lut. Pathianni zan dar 12:30-ah team pahnihin champion an inchuh zui dawn a, a hmuhnawm ang.

Xavi enkawl Barca hian Osasuna lakah goal an khung thei lawk lo. Mahse, second half-ah Robert Lewandowski leh Lamine Yamal te chuan goal khat ve ve an khung a, Saudi Arabia-ah final an lut.

Barcelona-in Spanish Super Cup-ah nomawi 14 chawi tawhin, champion ngun ber an ni a, an record tihropui zel an duh. Barca dawta champion hnem chu Real Madrid an ni a, vawi 12 nomawi chawi tawh team hian Catalan club nena an inkar sawr zim an duh thung ang.

Barca an chak

Riyadh khawpuia inkhelah Barcelona-in inkhel thunun mah se, an beisei ber goal an khung lawk thei lo a, goal khung loa chawlhlawk an hman avangin Catalan club ṭantute an hlauthawng hman.

Mahse, second half-ah Barca-in an duh ber goal an hmu ta nge nge a, Robert Lewandowski chuan Ilkay Gundogan siamsak chu goal-ah a chantir - tun season-a beisei phak lo striker tan tun season inelna hrang hranga goal 11 a khungna chiah a ni.

Lewy hi kum 35 mi a ni ve tawh a, Bayern Munich-a a vanglai ang a phak tawh lo a nih pawhin a demawm loh. Chutihrual chuan final-a Real Madrid tawng tur an nih avangin final hma chiaha an striker chhuanvawrin goal a khung hi Barca tan thil lawmawm a ni.

Barca tan hun pek belhah Yamal chuan goal khat a khung ve leh a, Osasuna tan thawhna chance a awm tawh lo - kum 16 mi forward hian tun season inelna hrang hrangah match 26 khelin goal hnih a khung a, assist vawi li a nei bawk.

Hmabak Real

Barcelona-in Spanish Super Cup semifinal-ah hnehna an chang a, an hmabaka ding hi Real Madrid an nih avangin a awlsam dawn lo. Chutihrual chuan season hmasa final-ah khan Barca hian 3-1 in Real hi an lo hneh tawh a, hmelma team hneh a, nomawi chawi an châk ang.

Hriat tel tur erawh Barca-in tun season-ah beisei an phak lo. La Liga table-ah pawh pathumna an ni mek a, Real hi hmahruaitu niin, an phak lohna chu point sarih ngawt a ni mek.

Season dang angin goal khungtu bik an nei lo tiin a sawi theih a, goal khung tam ber Lewy pawhin goal 11 chauh a la khung rih a, amah hnaih bertu Ferran Torres hian goal sarih a khung tawh - insiamṭhat an mamawh hle.

Mahse, an phurrit zualpui chhawk zangkhai turin Lewy-a'n Osasuna lakah goal a khung a, Real lakah a inringtawk sawt ang. Tun season-ah Barca hian Real hi vawi khat hmachhawn tawhin 2-1 in an tlawm a, thawnthu dang thlentir an duh dawn.

Real an ṭha

Carlo Ancelotti nauten season duhawm an hmang mek - La Liga-ah hmahruaitu an ni a, Champions League match ruk an khelhah chak vekin last 16 an lut a, Copa del Rey-ah round of 16 lutin, Spanish Super Cup final an lut bawk.

Spanish Super Cup final lut tur pawhin team ṭha Atletico Madrid an hneh a, 5-3 in an an chak - Real-in goal khung an harsat lo tih a lang a, tun season La Liga match 19-a goal 22 chhuah tawh Barca tan fimkhur a ṭul ang.

Madrid khaw club tan Jude Bellingham chuan tun season inelna hrang hrangah goal 17 ngawt a khung tawh a, Rodrygo chuan goal 11 a khung tawh bawk. Striker Joselu hi hming langsar ni lo mah se, goal 10 a khung tawh.

Real hian Vinícius Júnior leh Brahim Díaz an la nei bawk tih hriat a ṭha a, tlarhnungah Barca tan fimkhur a ṭul dawn. Real hian tlarhnungah Antonio Rüdiger, Nacho Fernandez, Dani Carvajal leh Ferland Mendy te an nei tih hriat a ṭha.

Barca beiseina

Spanish Super Cup final-ah Barca aiin Real-in rin an hlawh zawk a, mahse, mi tam zawk rin dan hi Barca boss Xavi chuan a ṭawmpui ve lo. Spanish coach chuan, "Kan kalphung, kan khelh dan bakah kan team neih en ila, Real hneh nan a tling tawk a ni," a ti a, a team a ringtawk hle.

Xavi chuan sawi zawmin, "Real kan hneh thei tih hi in awih loh chuan season hmasa final-a kan inkhel kha en rawh u. 3-1 in kan chak a, kawng tinrengah kan chungnung zawk. Tun season La Liga-ah erawh kan ngam lo a, mahse, kha inkhelah pawh khan minute 60 chu kan khel ṭha zawk a, kha aia result ṭha zawk kha kan phuah kan ngai a ni," a ti.

Barca boss chuan tun season-ah Real an che ṭha tih an hai bik loh thu sawiin, "Madrid lakah inkhel kan thunun a ṭul a, ṭum dang zawng aia kan khelh ṭhat a ngai. Madrid hi season hmasa ai khan an ṭha zawk a, mahse, kan thuhnuaiah dah kan tum ang," a ti a, chak a tum hle.

Real hian tun season inelna hrang hrangah match 27 khel tawhin, vawi khat chiah an la tlawm a, an tlawm chhun lah Atletico Madrid laka season tira an chak loh kha a ni - an hneh loh hnu pawh an hneh let leh tawh a, Barca hneh an inring khawp ang.