Australian Open : Grand Slam hmasa ber kan nghak chhuak dawn ta

Tennis ngainatute tan ennawm ropui chhawp chhuah a ni leh dawn ta. January 14, Pathianni zing aṭangin Australian Open khelh ṭan a ni dawn, tennis inelna lian hi Mizoram aṭang chuan Sony TV lamah live hmanga en theih a ni ang.

Season khat chhungin Grand Slam pali an khel ṭhin. Australian Open hi January 14-28 chhungin Melbourne Park-ah khelh a ni dawn a, a hnu lamah French Open, Wimbledon leh a hnu khar nan US Open te an la khel chho leh dawn a ni.

Djokovic lal ram

Tennis player ten inkhelh thiam bikna hmun an nei, mipa world number 1 Novak Djokovic tan chuan Melbourne nipui khaw lum hnuaia khelh ṭhin Australian Open aia hmun ṭha leh duhawm a awm thei tawh chuang lo, vawi 10 a champion tawhna hmun a ni.

Serbian star hian a match hmasa berah qualifier aṭanga in vaw tling a hmachhawn dawn, final kalkawnga a hmachhawn theih zingah Andy Murray, Stan Wawrinka, Stefanos Tsitsipas, Jannik Sinner, Andrey Rublev leh Alex de Minaur te an awm - kawng awlsam a ni dawn lo.

United Cup an khelh laiin Djokovic hi a banrek a hliam a, a hnu lamah a la inkhel leh lo. Serbia tana a feh chhuahna lamah hian Alex de Minaur a ngam lo, tunah De Minaur-a te ramah a lenglut zui dawn, boruak a nung ṭha khawp ang.

Mimala inbuatsaihna tournament nei hran loin Djokovic hi a inlan dawn tihna a ni a, a ṭhat ber kum a ni lo mai thei. Mahse, kum 36 mi hian tawnhriat a ngah tawk tawh a, champion beisei ngam lo chung chuan inelna a hmachhawn lo ang tih hriat a ṭha.

Mipa dang

Wimbledon champion Carlos Alcaraz pawhin inbuatsaihna tournament nei miah loin Australian Open hi a khel dawn. Spanish star hi season hmasa khan hliam vangin a inlan thei lo, kumina a match hmasa ber atan Richard Gasquet a tum dawn.

World number 2 Alcaraz hi seeded pahnihna pek a ni a, a kaltluang zel a nih pawhin final hma chuan Djokovic nen an inhmachhawn thei dawn lo. Semifinal hmain Alexander Zverev, Daniil Medvedev leh Casper Ruud te a hmachhawn theih zingah an awm.

Season hmasa finalist Stefanos Tsitsipas hi player en hlawh tur zinga mi a ni a, Greek tlangval hian tournament ṭan niah Matteo Berrettini a tum ang. Season hmasa lama final khel phak a nih avangin kuminah pawh thleng sang leh tura beisei a ni.

Mipa player dang zingah chuan final vawi hnih khel tawh Daniil Medvedev bakah, Italian rawlthar ṭha mi Jannik Sinner te hi Djokovic-a nomawi chuhpui phak tur zinga ngaih an ni a, tournament dang an khelh tawh dan en chuan champion turin theihna an nei.

Hmeichhe lam

Iga Swiatek chu rinkai a ni leh dawn, world number 1 hi seeded pakhatna pek a ni a, a match hmasa bera a khingpui tur Sofia Kenin hi 2020 Australian Open champion thei a nih avang erawh chuan a fimkhur a ngai dawn hle.

Champion lai Aryna Sabalenka chuan qualifying aṭanga in vaw tling a tum dawn, harsa vak loin first round chu a paltlang mai a rinawm. Kum 2023 finalist Elena Rybakina-i bul ṭanna tur chu Karolina Pliskova niin, ani hi champion thei tur zinga mi a ni ang.

US Open champion Coco Gauff chuan tournament ṭan niah Anna Karolina Schmiedlovs a tum dawn. American tleirawl Gauff hi kum 19 mi chauh la ni mah se khelmual chhungah a puitling tawh viau, a vawi hnih nan Grand Slam nomawi chawi a tum dawn a ni.

Fa a neih hnuah Naomi Osaka a lo kir leh tawh a, Japanese star hian Grand Slam title pali a lak tawh zinga pahnih chu Australian Open aṭanga a hlawh chhuah a ni. Hard court hi a inkhelh thiamna a ni a, world number 833-na daih ni mah se dah hniam a rem lo.