Chelsea mikhual tur Fulham

Chelsea-in zanin dar 6:00 hian Fulham an mikhual dawn a, League Cup semifinal first leg-a Middlesbrough hneh lotu Mauricio Pochettino hote tan Premier League inkhel pawimawh a ni.

Blues hian Premier League match hnuhnung pahnihah hnehna an chang a, Crystal Palace (2-1) leh Luton Town (3-2) te an hneh. Hemi zawh hian FA Cup-ah Preston North End 4-0 sawpin team boruak ṭha viau mah se match hnuhnung berah Boro an hneh lo.

Poch-a hote hian season thara European competition khel phak turin Cottagers an hneh hi a ṭul a, an chetsual a thiang tawh lo. Nikum October thlatir khan Craven Cottage-ah Fulham hi 2-0 in an hneh a, record thlirlet pawhin Blues dinhmun a ṭha.

Chelsea hian Stamford Bridge-ah Fulham lakah hian match 18 chhung an tlawm tawh lo a, October 1979-a an chak loh kha Cottagers laka an muala an tlawm hnuhnung ber a ni.

Mahse, Fulham hi zuam ngawt a rem lo. Marco Silva hote hian league match hnuhnung berah Arsenal 2-1 in an hneh thei a, Chelsea ang thoa League Cup semifinal inpetkai thei an ni bawk.