Dortmund no. 10 ha tur Sancho

Borussia Dortmund chuan Jadon Sancho chu jersey no. 10 nen an pho chhuak a, zanin dar 11:00-a Darmstadt an hmachhawn hunah inlan thei dinhmunah a ding.

Bundesliga-in thlasik chawlh an neih hnuin nizan aṭang khan inelna an ṭan leh a, Bayern Munich leh Hoffenheim inkhel result kan hre hman lo. Bayern-in hnehna an chang a nih pawhin Bayer Leverkusen-in hma an hruai chhunzawm dawn. Xabi Alonso hote hian zanin dar 8:00-ah Augsburg an tlawh thung ang.

German footballer ropui ber ang hiala chhal ngam Franz Beckenbauer-a thih aṭanga Bundesliga match hmasa ber tur a nih avangin tunkar tawp inkhel zawng zawngah Der Kaiser sunna hian hmun pawimawh a chang dawn. Inkhel bik thir erawh chuan Dormund fapa tlanbo kir leh ta 'Sancho' hian ngaihven a hlawh thung ang.

Erik Ten Hag nen inhmuh thiam loh vanga tun hnaia Manchester United first team aṭanga paih Sancho hi mipui hmaah a inlan leh tawh a, English winger hi a hmel aṭangin a hlim tih a lang thei. Sancho chuan, "Dressing room-a ka luh khan mahni ina let ang mai ka ni," tiin a sawi.

Borussia Dortmund director Sebastian Kehl chuan, "Sancho laklet hi hna awlsam a ni lo a, ni tam tak a mamawh a ni. Khelh châkin a tuihal a, a theihna ang pho chhuak leh turin theihtawp kan chhuah ang," tiin a sawi a, English winger hian team training a zawm leh tawh bawk.