Zanin aṭangin Africa Cup of Nations
Africa rama football hmanga inelna lian leh sang ber Africa Cup of Nations 2024 chu khelh ṭan a ni dawn, zanin dar 1:30 hian match hmasa ber atan a thlengtu Ivory Coast leh Guinea-Bissau ten an khel ang.
Afcon 2014-ah hian team 24 an inlan dawn a, group hrang parukah ṭhen niin, an inkhelh kual hnuah a sang pahnih zel an tlang nghal ang, pathumna zinga a ti ṭha pali an tlang thei dawn bawk a ni.
A thlengtu hun
Ivory Coast hian a vawi thum nan champion an tum dawn, a thlengtu an nih avangin zanin hian Alassane Ouattara Stadium-ah mipui an tam dawn tih a chiang a, khelmual pawn lam aṭanga puihna an dawng ṭha khawp ang.
Group stage bik hi chu an harsat ngai lo, tun hmain inelna an hmachhawn hnuhnung pakuaah Ivory Coast hian vawi riat chu knockout stage an lut, tun ṭumah pawh hian group A aṭanga tlan rinkai an ni.
Player tawnhriat nei ṭha zingah Eric Bailly, Wilfried Zaha leh Nicolas Pepe te tel lo mah se, Franck Kessie, Seko Fofana leh Ibrahim Sangare te an nei tho a, an buai lo tura ngaih a ni.
Nigeria leh Osimhen
African Footballer of the Year nilai a ni a, Afcon qualifying lamah goal 10 khungin ani aia khung hnem an awm lo. Victor Osimhen hi Nigeria tan chuan innghahna thlam a ni a, Pathianni zana Equatorial Guinea nen an intawn hunah pawh ven bik ngai a ni dawn.
Super Eagles (Nigeria sawina) hian qualifying lamah goal 22 an khung thei a, khung tam ber niin attacking football hmuhnawm an chhawp chhuak ṭhin, inelna takah pawh team dang tan dan an harsain a rinawm.
Osimhen hian season hmasa khan khawvel barakhaihin Napoli chu Serie A nomawi a chawipui, kuminah an ram a hlawhtlin pui leh a nih ngat chuan European club lian ho chil a ti put zual ngei ang.
Salah telna
Zanin dar 10:30-ah Egypt chuan Mozambique an hmachhawn dawn, player langsar Mohamed Salah awmna ram a nih avangin inkhel hi Mizoram aṭang pawhin ngaihventu an tam ang.
Salah hian Liverpool tan hlawhtlinna hrang hrang a chang kim tawh, mahse an ram Egypt hi nomawi a la chawipui lo. Afcon 2017 leh 2021 te khan pahnihna dinhmun chu a lo luah pui tawh.
Season kal laiah Salah hian Reds chu hlawhtlinna chanpui thei dinhmunah a ding leh mek a, an ram tan nomawi a hlawh chhuak bawk a nih chuan mimal chawimawina sang dawng turin a buk a rit zual ngei ang.