United khingpui tur Son tel lohna Spurs

Manchester United-in zanin dar 10:00 hian Old Trafford-ah Tottenham Hotspur an mikhual dawn. Spurs hian an player pawimawh bera chhal ngam Son Heung-min chu Asian Cup khelh vangin an chhawr thei dawn lo a, manager Ange Postecoglou tan channa lian tak a ni.

Premier League season ṭantir lamah khan Man United hian Spurs lakah 2-0 in hma hruai mah se 2-2 in inkhel a tawp. Khami ṭum khan Erik Ten Hag-a hote hi chak se chuan season ṭha zawk an hmang ngei ang. Tun ṭumah hian Man United tan insiamṭhatna hun ṭha a inhawng a, Spurs hi an hneh a nih chuan Champions League khelh beiseina a nung thar dawn.

Werner leh Dragusin

Spurs hian Son chhawr thei dawn lo mah se RB Leipzig aṭangin Germany international Timo Werner an lalut. Werner hian Chelsea leh RB Leipzig-ah beisei pha tawk lo mah se theihna sang tak a nei tih a lantir tawh.

Kum 27 mi Werner hi khel nghal thei dinhmunah a ding a, German forward hian Man United laka goal khung hi hming chherna ṭha tak a ni tih a hrechiang ang.

Spurs hian pound maktaduai 25-in Romania defender Radu Dragusin an lalut a, Genoa tana tun season-a Serie A match 22 khel vek a nih avangin Postecoglou-a'n hmun pawimawh a chantir a nih pawhin a mak lo ang.

Tottenham hian defender pahnih Cristian Romero leh Micky van de Ven inhliam vanga defence laiah Emerson leh Ben Davies te an inkawptir a ṭul hial a, Dragusin hian bul a ṭan nghal rinawm. Chutihrualin FA Cup-a Burnley an hneh ṭumini Van de Ven, Ryan Sessegnon leh Rodrigo Bentancur te squad-ah an awm leh tawh tih hriat a ṭha.

Spurs harsatna belhchhah turin Senegal midfielder Pape Sarr leh Mali midfielder Yves Bissouma ten AFCON an khel dawn a, Man United mikhual tur hi Spurs ṭha ber an ni lo.

United thar

Man United hian chet ṭhat neih bawk mah se chet ṭhat zawn an nei thei meuh lo a, Spurs ang bawka player inhliam an ngah avangin an result ṭha tawk loah chhuanlam an nei thei ang.

Christian Eriksen leh Luke Shaw te Spurs lakah bul an ṭan leh theih a rinawm a, AFCON zin tur goalkeeper Andre Onana an la chhawr theih dawn bawk avangin Ten Hag-a hote hian point thum hmuh ngei an tum ang.

Tawnhriat nei ṭha Lisandro Martinez leh Casemiro ten training an zawm tawh a, an inlan erawh a la rinawm lo zawk. Rasmus Hojlund-a'n tun season Premier League-ah goal khat chauh a la khung a, United-in harhtharna an chan nan Danish striker chet ṭhat hi a pawimawh hle.

Tottenham nen an inhnehtawk ṭuma goal khungtu Jadon Sancho-a'n Borussia Dortmund a pan tawh a; goal khungtu dang Marcus Rashford bakah Alejandro Garnacho leh Bruno Fernandes te an pawimawh ang.